«Jaıly mektep» ulttyq jobasy aıasynda 2,4 trln teńgege 369 mektep salynady, dep habarlaıdy Almaty-akshamy.kz.
2022 jyldyń qyrkúıeginde Memleket basshysy Qasym-Jomart Toqaev «Jaıly mektep» ulttyq jobasyn ázirleýdi jáne júzege asyrýdy tapsyrǵan bolatyn. Prezıdent árbir qazaqstandyq oqýshynyń bilim alýy men jan-jaqty damýy úshin laıyqty jaǵdaı jasalýy kerektigin atap ótti.
Ulttyq joba apatty mektepterdi, úsh aýysymda oqytýdy jáne oqýshylar ornynyń tapshylyǵyn joıýǵa baǵyttalǵan.
Joba aıasynda 740 myń oqýshyǵa arnalǵan jańa baǵyttaǵy 369 zamanaýı mektep salý josparlanýda.
Qalalarda – 205, aýyldarda 164 bilim berý nysany salynady.
217 ǵımarattyń qurylysyn 2024 jyly, taǵy 152 ǵımaratty 2025 jyly aıaqtaý josparlanǵan.
Jalpy jobany júzege asyrýǵa barlyǵy 2,4 trıllıon teńge bólinedi.