Eksporttyq áleýetti keńeıtý jáne qazaqstandyq taýarlardy syrtqy naryqtarǵa ilgeriletý maqsatynda Azıadaǵy eń iri B2C alańdarynyń biri sanalatyn Qytaıdyń JD.com platformasynda Qazaqstan Respýblıkasynyń Ulttyq pavılonyn damytý boıynsha belsendi jumys júrgizilýde.
Búgingi tańda ulttyq pavılonda azyq-túlik, kosmetıka, bal jáne basqa da suranysqa ıe taýar sanattaryn qosa alǵanda, 15 qazaqstandyq taýar óndirýshiniń 44 ónim túri usynylǵan.
Pavılon iske qosylǵan sátten bastap satylǵan ónimniń jalpy kólemi 2,4 mln ıýándy qurady, onyń 1,18 mln ıýánnan astamy — 2024 jylǵa tıesili.
Qazaqstandyq ónimder onlaın satý alańynan bólek, Qytaıdaǵy oflaın-kórmelerde jáne B2B-prezentasıalarda turaqty túrde usynylady. Bul saýda baılanystaryn nyǵaıtýǵa, brendterdiń tanymaldylyǵyn arttyrýǵa jáne eksporttyq geografıany keńeıtýge yqpal etedi.
Negizgi baǵyttardyń biri - QHR naryǵynda tez tanymal bolyp kele jatqan elektrondyq saýdanyń jańa formaty — strımıng-satýdy damytý.
Máselen, ótken jyldyń qarasha aıynda Qytaıdyń halyqaralyq ımporttyq kórmesi (CIIE 2024) aıasynda, Jiangsu Soho Holding Group Co Ltd,seriktesteriniń qoldaýymen Douyin (TikTok analogy) platformasy arqyly strımıng júrgizildi. Onda Qazaqstannyń ulttyq strımıng-pavılonynyń resmı ashylýy ótti.
Tikeleı efırde qytaılyq tutynýshylar ónimdermen naqty ýaqyt rejıminde tanysýǵa, suraqtar qoıýǵa jáne satyp alýdy dereý rásimdeýge múmkindik aldy. Translásıa qorytyndysy boıynsha satý kólemi 450 myń ıýándy qurady, bul osy ilgeriletý arnasynyń joǵary tıimdiligin jáne tutynýshylardyń Qazaqstannan keletin taýarlarǵa degen qyzyǵýshylyǵyn rastady.
"Bizdiń mindetimiz — qazaqstandyq ónimniń jetekshi sıfrlyq saýda alańdarynda júıeli túrde bolýyn qamtamasyz etý. Biz eksportty JD.com, Alibaba.com, Europages, Noon jáne TikTok dúkeni platformalary arqyly belsendi túrde damytamyz. Bul otandyq kompanıalarǵa jańa naryqtarǵa shyǵýǵa, eksporttyq kiristi ulǵaıtýǵa jáne jahandyq saýda tizbekterine kirigýge múmkindik beredi", - dep atap ótti QazTrade AQ Bas dırektory Aıtmuhamed Aldajarov.
QazTrade analıtıkalyq derekterine sáıkes, 2024 jyly álemde onlaın-satyp alýshylar sany 2,71 mlrd adamǵa jetti, al elektrondyq saýda naryǵynyń jahandyq kólemi 6,3 trln AQSH dollaryn qurady, bul 2023 jylmen salystyrǵanda 8,76% - ǵa artyq.
Qazaqstan Respýblıkasynda ótken jyldyń qorytyndysy boıynsha elektrondyq saýda kólemi 3,2 trln teńgeni qurady, bul bólshek taýar aınalymynyń jalpy kóleminiń 14,5% - na teń.
2029 jylǵa deıingi boljamdar jahandyq onlaın-naryqtyń odan ári ósýin kórsetedi: paıdalanýshylar sany 3,6 mlrd adamǵa jetedi dep kútilýde, bul rette Qytaı e-commerce álemdik naryǵyndaǵy jetekshi úlesti saqtaıdy. Bul dál Qytaı baǵytynda qazaqstandyq qatysýdy odan ári nyǵaıtýdyń strategıalyq mańyzdylyǵyn kórsetedi.