Aqmola oblysynda agroónerkásip keshenindegi iri jobalar belsendi túrde júzege asyrylyp jatyr. Solardyń biri — Torǵaı aýyldyq okrýginde mal sharýashylyǵy klasterin qurý.
«Ereımentaý-Astyq» JSHS 10 myń bas qoıǵa arnalǵan bordaqylaý jáne ósirý fermasynyń qurylysyn bastady.
Kompanıalar tobynyń bas dırektor orynbasary Qonyspek Nurǵazınniń aıtýynsha, joba aıasynda bordaqylaý alańyna arnalǵan bazany salý jáne qaıta jańartý, serýen alańdaryn, qorshaýlar men astyq qoımalaryn, sondaı-aq mal azyǵyn óndiretin seh turǵyzý kózdelgen. Sonymen qatar, traktorlar, azyq taratqyshtar men jem óndirýge arnalǵan qural-jabdyqtardy satyp alý josparlanǵan.
«Biz eksporttyq baǵytty belsendi túrde damytyp jatyrmyz. Jyl basynan beri qazaqstandyq ónimderdi Katarǵa jetkizýdi bastadyq. Qazaqstandyq et arab elderinde joǵary suranysqa ıe jáne óz brendi retinde tanylǵan. Biz iri kólemdegi jetkizilimderge uzaq merzimdi kelisimsharttar jasasýǵa daıynbyz. Qazirgi tańda BAÁ-de akredıtasıadan ótý jumystary júrip jatyr», — dedi «Altyn taǵa» holdıńiniń satý bóliminiń basshysy Altynbek Orynbaev.
Ereımentaý qalasynda 10 myń bas iri qaraǵa arnalǵan sıyr etin óndiretin agroónerkásip kesheni salynady. Joba aıasynda jylyna 90 myń tonna jem jáne 7,6 myń tonnadan astam sıyr etin óndirý josparlanǵan.
Jobanyń ınvestory — «Big Farm» JSHS. Kompanıa bul tik ıntegrasıalanǵan keshenge 77 mlrd teńgeden astam ınvestısıa salýdy josparlap otyr. Bul Qazaqstannyń eksporttyq áleýetin aıtarlyqtaı arttyryp, 380 turaqty jumys ornyn ashýǵa múmkindik beredi. Sonymen qatar, qyzmetkerler úshin turǵyn úıler salý da qarastyrylǵan.
Aqmola oblysyndaǵy mal sharýashylyǵy klasteri — agrarlyq sektordy damytý men eldiń azyq-túlik qaýipsizdigin qamtamasyz etýge baǵyttalǵan strategıalyq baǵdarlamanyń mańyzdy bóligi. Bul bastama et pen et ónimderiniń eksport kólemin arttyrýǵa sep bolmaq.