Qańtar aıynyń basynda kóptegen óńirde aýa raıy nasharlap, toǵyz oblysta avtojoldar jabyldy.
Bul týraly QR İshki ister mınıstrliginiń ókili Shuǵyla Turlybek aıtty, dep habarlaıdy Almaty-akshamy.kz QazAqparatqa silteme jasap.
«Eń qıyn kúnder 3 jáne 4 qańtarda boldy, qar, qatty jel, boran bolyp, kórý nasharlady. Elimizdiń 9 óńirinde respýblıkalyq jáne oblystyq mańyzy bar avtojoldardyń 79 ýchaskesinde kólik qozǵalysyna shekteýler engizildi. Joldarda TJ joıý jónindegi respýblıkalyq shtab quryldy», - dedi İshki ister mınıstrliginiń ókili aptalyq onlaın brıfıńide.
Sh. Turlybektiń aıtýynsha, evakýasıalaý úshin 769 ýaqytsha jylytý pýnkti daıyndaldy.
Apattan qutqarý jumysyna 4 myńnan astam adam jáne 1,5 myń tehnıka jumyldyryldy.
«Jeke júrgizýshiler polısıanyń joldaǵy qozǵalys shekteýlerin elemeı, qolaısyz aýa raıynda qaýipti ýchaskelerge shyǵyp, ózderine jáne jolaýshylaryna ómir men densaýlyqqa qaýip tóndiredi. Kóp jaǵdaıda olardyń kóligi qar qursaýynda qalady jáne olardy qutqarý úshin polısıa men TJ qyzmetkerleri táýekelge baryp, resýrstardy jumsaýǵa májbúr bolady. Kólik júrgizýshileri jabyq joldarǵa shyqpaý jóninde polısıanyń zańdy talaptaryna baǵynbaǵan jaǵdaılarda, olarǵa 30 AEK nemese 103 500 teńge aıyppul, 15 táýlikke deıin ákimshilik qamaqqa alý túrinde ákimshilik jaýapkershilik qaralǵanyn eskertemiz», - dedi spıker.
Aýa raıy jaǵdaıy nasharlaǵan jaǵdaıda joldardaǵy jaǵdaı halyqqa SMS-taratý, ınternet-arnalar jáne teleradıo habarlary arqyly aldyn ala jetkiziledi.
İshki ister mınıstrligi azamattarǵa joldaǵy jaǵdaıdy aldyn ala bilýge keńes beredi.
Aýa raıynyń nasharlaýyna baılanysty jabyq ýchaskeler týraly senimdi aqparatty 112, 102 telefondary, sondaı-aq «Qazavtojol» UK» AQ baılanys ortalyǵynan 1403 telefony boıynsha bilýge bolady.