Bul İİM-niń málimdemesi.
2023 jyldyń basynan beri krımınaldyq polısıa qyzmetiniń jedel ýákilderi 2,5 myń izdeýde júrgen qylmyskerdi ustady, dep habarlaıdy Almaty-akshamy.kz
İzdestirý jumystary tek el aýmaǵynda ǵana emes, basqa memleketterde de júzege asyrylady
Arada jyldar ótse de, shetel asqan qylmyskerdi ustaý, dalada joǵalǵan balany tabý, belgisiz jaǵdaıda qaza bolǵan adamnyń jeke basyn anyqtaý – İİM krımınaldyq polısıa qyzmetkerleriniń jumysynda kezdesetin dúnıeler.
2023 jyldyń basynan beri bul qyzmettiń jedel ýákilderi 2,5 myń izdeýde júrgen qylmyskerdi ustady, onyń ishinde:
34 kisi óltirýshi;
17 qaraqshy;
84 tonaýshy;
10 bopsalaýshy;
11 zorlyqshy;
87 esirtki qylmyskeri bar.
«Mysaly, osy jyldyń shilde aıynda Shymkentte jedel-izdestirý is-sharalary barysynda bizdiń qyzmetkerler 2018 jyly Dýbaıda kisi óltirgeni úshin izdeýde júrgen er adamdy ustady. Sondaı-aq Tarazda 2022 jyldyń qarasha aıynan bastap Qaraǵandy oblysynyń polısıa departamentimen kisi óltirýge oqtalǵany úshin izdeýde júrgen eki azamat quryqtaldy»,-dedi QR İİM krımınaldyq polısıa departamenti bastyǵynyń orynbasary Rýslan Nazarov.
Qylmyskerlerdi izdeý tek el aýmaǵymen shektelmeıdi. İzdestirý jumystary basqa memleketterde de júzege asyrylady. Bul rette Interpoldyń Ulttyq ortalyq búrosynyń múmkindikteri keńinen qoldanylady. Sonymen qatar TMD-ǵa qatysýshy elderdiń aýmaǵynda jylyna eki ret «İzdestirý» operasıasy júrgiziledi.
«Elden tys jerlerde jyl basynan beri 70 qylmyskerdi ustap, odan bólek taǵy 36 izdeýde júrgen adamdy anyqtadyq. Olar AQSH, Shvesıa, Germanıa, Túrkıa, sondaı-aq ózge de alys-jaqyn elderde tabyldy»,-dep atap ótti Rýslan Nazarov.
Qazaqstan İİM jedel-izdestirý toptary shetelde 34 qylmyskerdi ustap, habar-osharsyz ketken bir adamdy tapty. Al Qazaqstan aýmaǵynda basqa memleketterdiń quqyq qorǵaý organdarymen izdeýde júrgen 374 qylmysker tabyldy.
«Máselen, bizdiń jedel-izdestirý tobymyz qarasha aıynda Grýzıa qalalarynyń birinde 2019 jyldyń sáýirinen 2020 jyldyń aqpanyna deıin qarjy pıramıdasyn qurǵan jáne basqarǵan kúdiktini ustady. Ol azamattarǵa 2 mlrd teńgeden astam shyǵyn keltirgen»,-dedi spıker.