Óskemen qalalyq polısıa basqarmasy ákimshilik polısıa bóliminiń bastyǵy qamaýǵa alyndy. Bul týraly Sybaılas jemqorlyqqa qarsy is-qımyl agenttiginiń resmı ókili Arman Tileýkenov aıtty, dep habarlaıdy almaty-akshamy.kz.
«Shyǵys Qazaqstan oblysynyń sybaılas jemqorlyqqa qarsy qyzmeti UQK departamentimen ózara is-qımyl jasaı otyryp, jasyryn tergeý áreketteriniń nátıjesinde Óskemen qalalyq polısıa basqarmasy ákimshilik polısıa bóliminiń laýazymdy tulǵalary men basqa da adamdardyń jemqorlyq áreketterin áshkereledi. Mamandandyrylǵan turaqtardan avtokólik quraldaryn berý kezinde júıeli túrde para alý faktisimen ákimshilik polısıa bóliminiń bastyǵy sot sanksıasymen qamaýǵa alyndy. Qazirgi ýaqytta sotqa deıingi tergeý aıaqtalý satysynda», - dedi Arman Tileýkenov vedomstvoda ótken brıfıńide.
Onyń atap ótýinshe, Qylmystyq-prosestik kodekstiń 201-babyna sáıkes, ózge aqparat jarıa etýge jatpaıdy.
«Konstıtýsıanyń 77-baby 3-tarmaǵynyń 1-tarmaqshasyna jáne Qylmystyq-prosestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», - dedi ol.