Almatydaǵy №176 mektep-gımnazıasynda oqýshylarǵa arnalǵan motıvasıalyq kezdesý ótti. "Eńbek - eńse kóteredi" jobasy aıasynda ótken maǵynaly kezdesýdiń bas keıipkeri IT salasynyń úzdigi Aıbolat Qultaı boldy.
Óz eńbegimen eńse kótergen bilikti mamanmen kezdesýge mekteptiń 10-11 synyp oqýshylary qatysty. Mamandyq tańdaý aldynda turǵan oqýshylar úshin arnaıy uıymdastyrylǵan sharany Almaty qalasy Qoǵamdyq damý basqarmasy Qoǵamdyq damý ortalyǵynyń qoldaýymen uıymdastyrǵan bolatyn.
Kezdesý barysynda IT mamany Aıbolat Qultaı óziniń mamandyq tańdaý kezindegi jáne stýdenttik kezdegi tájirıbelerimen bólise otyryp, tańdaǵan mamandyǵynyń ómirine qalaı áser etkenin baıandady. Ári óziniń IT jobalarynyń jasalý barysyn, olardyń qyzmeti men nátıjelerin, aldaǵy joba-josparlarymen bólisti.
"Kezdesýde óz salamnyń tóńireginde damý tendensıalaryn jas jetkinshekterge túsindirsem deımin. IT jobalarymdy tanystyra otyryp, bolashaq maman ıeleriniń bul salaǵa degen túsinigin, qyzyǵýshylyǵyn arttyrýdy maqsat etip keldim. Qazir bul sala boıynsha Qazaqstan da álem kóshinen shetkeri qalyp jatqan joq, tipti keıbir eýropalyq elderden de alda ketken jaqtarymyz bar. Jalpy, bul sala boıynsha elimizde múmkindik óte joǵary. Bul týraly oqýshylar bilse jáne bolashaq suranysy bar osy salaǵa kóńil aýdarsa degen úmitim bar," – deıdi Aıbolat Qultaı.
Atalǵan salada eńbek etip kele jatqan azamat buǵan deıin elge belgili bolǵan Aqyl Battle mobıldi ıntellektýaldy oıyny men @sez.app qosymshasynyń avtory. Ári Thousand IT kompanıasynyń negizin qalaýshy.
"Álemde de, elimizde de IT mamandaryna degen tapshylyq baıqalady. Elimizde 2025 jyldyń ózinde 100 myń IT mamanyna degen tapshylyq bolatyny buǵan deıin Memleket basshysy da atap ótkeni bar. Sondyqtan mamandyq tańdaý aldyndaǵy oqýshylardyń bul salaǵa bet burýy, qyzyǵýshylyq tanytýy mańyzdy dep oılaımyn," – deıdi sala mamany.
Joǵary synyp oqýshylary ózderine qatysty bul kezdesýge qyzyǵýshylyq tanytty. Keıipkermen suraq-jaýap barysynda oqýshylardyń osy salaǵa degen yntasy joǵary ekeni de baıqaldy.
"Eńbek - eńse kóteredi" áleýmettik jobasy aıasynda mundaı kezdesýler buǵan deıin de qaladaǵy birqatar mektepte ótkizilgen. Uıymdastyrýshy retinde "Jaýhar" qoǵamdyq qorynyń jetekshisi Nurıslam Ismaıyl jobanyń basty máni mektep bitirý aldyndaǵy oqýshylardyń zamanaýı syn-qaterlerge beıimdiligin arttyryp, bolashaqta tabysty tulǵaǵa aınalýyna yqpal etý dep sanaıdy.