Megapolıstegi Memlekettik ortalyq mýzeıi Qazaqstannyń «Asia Doll» qýyrshaq sheberleriniń shyǵarmashylyq odaǵymen birlesip, avtorlyq qýyrshaqtar men Teddı qonjyqtarynyń halyqaralyq kórmesin ashty. Onda ártúrli tehnıkada oryndalǵan 100-ge jýyq avtorlyq jumys usynyldy.
Kórmeniń ashylý saltanatynda Almatynyń belgili sýretshileri, galerısteri boı kórsetti. Bıylǵy kórmege Almaty, Óskemen, Rıdder, Kókshetaý, Taraz, Pavlodar, Astana, Semeı, Oral, Altaı (Qazaqstan), Bishkek (Qyrǵyzstan), Tashkent (Ózbekstan) qalalarynan 50-den astam sheber qatysty. Olar ónerdi súıetin kórermenderiniń nazaryna polımerli sazdan, matadan jáne kıizden jasalǵan san alýan avtorlyq qýyrshaqtaryn usyndy. Kórme qýyrshaq jasaý óneriniń zamanaýı baǵyttary men erekshelikterin pash etip, Qazaqstan men TMD elderiniń qýyrshaq jasaıtyn sheberleriniń koleksıalarymen jáne jumystarymen tanystyrdy.
Kórme aıasynda «Jibek jolynyń altyn ǵasyry» uzaq merzimdi jobasy usynyldy. Onda Jibek joly boıyndaǵy elderdiń tańǵajaıyp keıipkerleri, etnıkalyq kıimderi, janýarlary men adamdarynyń beınelerin kórsetetin avtorlyq shyǵarmalary erekshe yqylasqa bólendi.
Kórmeni uıymdastyrýshy, Qazaqstan «Asia Doll» qýyrshaq sheberleri shyǵarmashylyq odaǵynyń jetekshisi Tatána Semónova «Jibek joly» jobasy ulttyq taqyryptaǵy týyndylardy qamtıtynyn atap ótti.
«Sheberler adamdardyń jibek matalar, baǵaly tastar bolǵan sonaý kezeńde qalaı kıingenin, ol tusta da talǵamnyń joǵary bolǵanyn kórsetýge tyrysty. Ár qýyrshaq beınesi tarıhpen baılanysty, árqaısysy tereń zerttelgen», – dedi ol.
Iá, kórme tórinen oryn alǵan qýyrshaqtar sartyldaǵan stanoktan jasalyp shyqqan bir-birine uqsas týyndylar emes, olar sheberlerdiń kóz maıyn taýysa otyryp, birneshe aı boıy jasaǵan beıneleri. Bir danamen ǵana shyqqan ár qýyrshaqtyń jasalý tehnıkasy da, taqyryby da bólek. Máselen, bir qýyrshaq shattanyp tursa, ekinshisiniń kózinde muń bar. Úshinshisi buzyqtaý, al tórtinshisi erkeleý. Sheberlerdiń jumysynda kórkemdik pen tehnıka erekshe úılesim tapqan. Iaǵnı, ár qýyrshaqta adamnyń hám sheberdiń jany bar. Al bizge aq jaýlyqty ájesiniń jyp-jyly arqasynda maýjyrap uıqy qysyp kele jatqan nemere ádemi áser qaldyrdy.
Kórmeniń maqsaty – almatylyqtarǵa jáne qala qonaqtaryna elimizdegi daryndy sheberlerdi tanystyrý. Qýyrshaq sheberleriniń kóz maıyn taýysyp ómirge ákelgen týyndylary kórýge turarlyq.
Rashıda HARIPOVA, QR Memlekettik ortalyq mýzeıiniń dırektory:
– Burynǵylar búgingideı túrli qyzyldy-jasyldy áshekeı buıymdar bolmaǵan zamanda qýyrshaqty qoldan tigip, ishin shóppen, matamen toltyryp, kózin jipten tigip, aǵashtan da jonyp jasap, balasyn qýantýǵa, oınatýǵa, oı-órisin damytýǵa umtylǵan. Birde bir psıhologpen tildesip qalǵanym bar. Qurbysynyń bes jasar qyzy múldem sóılemeıdi eken. Sodan tanysyna balasynyń eń súıikti qýyrshaǵymen ara-qatynasyna mán berýge keńes aıtady. Búldirshin kúni-túni sol qýyrshaǵymen birge bolyp, birge uıyqtap, birge oıanyp, birge tamaqtanyp, byldyrlap sóılesýdi ádetke aınaldyrǵanynyń nátıjesinde tili shyǵady. Demek, qýyrshaq ta bizge dos, serik bola alady degen sóz. Qýyrshaq oıynshyq qana emes, bul – óner. Ol mádenıet pen dástúrlerdi jandandyrý, sondaı-aq bizge ótken dáýirdiń erekshe beınelerin jetkizý tásili desek, qatelespeımiz. Máselen, myna «Tomırıs» qýyrshaǵynan sol zamannyń energetıkasyn sezinýge bolady. Jas urpaq tarıhı beınedegi qýyrshaq pen onyń oqýlyqtaǵy tulǵasyn salystyrý arqyly tarıhymyzǵa degen qyzyǵýshylyǵy oıanýy múmkin. Sondyqtan bul kórmedegi Uly Jibek joly boıynda ómir súrgen ártúrli halyqtyń keıipkerlerimen tanysýǵa múmkindik beretin «Jibek jolynyń altyn ǵasyry» jobasynyń biregeıligin erekshe atap ótkim keledi.