Almatyda ınternet-alaıaqtyqty 10,5%-ǵa tómendetýge múmkindik týdy.
Quqyq qorǵaý organdary zıatkerlik menshik quqyqtaryn buzýmen baılanysty qylmystardyń aldyn alý jáne olarǵa qarsy kúresti kúsheıtý boıynsha jumys júrgizýde, dep habarlaıdy aqshamnews.kz Polisia.kz-ke silteme jasap.
– Jedel jaǵdaıdy turaqtandyrý maqsatynda polıseıler halyqpen jumysty negizgi krıterııler boıynsha júrgizedi . Bul eń aldymen, halyqtyń quqyqtyq saýattylyǵy, ıaǵnı BAQ deńgeıinde qoljetimdi jáne túsinikti aqparattyq jumys, býkletter, broshúralar, kóshelerde, qoǵamdyq oryndarda, ınternet-alaıaqtyqtyń túrleri men ádisteri týraly eskertýler. Sondaı-aq alaıaqtyqtyń jańa túrlerine, olardy jasaý joldaryna jáne der kezinde aldyn alý sharalaryna monıtorıń júrgizilýde, – deıdi Medeý aýdandyq polısıa basqarmasynyń bastyǵy İlıas Ómirserikov.
Spıkerdiń aıtýynsha, qaladaǵy saýda ortalyqtary men sýpermarketterde ınternet-alaıaqtyqtyń aldyn alý boıynsha posterler ilinip, qalanyń ortalyq kóshelerindegi elektrondy bılbordtarda ınternet-alaıaqtyqtyń ádisteri men túrleri týraly eskertpe beınerolıkter kórsetilýde.
– Qurmetti Almaty qalasynyń turǵyndary men qonaqtary! Sizderge taǵy da júgingim keledi jáne sizderden, eń aldymen, jeke derekterińizge qatysty tártipti saqtaýlaryńyzdy suraımyn: jeke aqparatty, telefon qupıa sózderińizdi nemese kartalaryńyzdyń CVR kodtaryn eshkimmen bólispeńiz. Olardy alaıaqtar paıdalanýy múmkin. Bankten túsken kez kelgen qońyraýdy, týystarmen bolǵan kez kelgen jaǵdaıdy qaıta-qaıta tekserý kerek, – dedi İlıas Ómirserikov.
Esterińizge sala keteıik, bul kúnderi Almatyda aqparattyq tehnologıalardy qoldaný arqyly jasalǵan quqyq buzýshylyqpen kúresý sharalarynyń tıimdiligin arttyrýǵa baǵyttalǵan “Anti Fraud” respýblıkalyq is-sharasy ótýde.