Stýdentter marapattan bólek jumysqa ornalasý múmkindigine ıe bolady.
IT saıys 26-27 naýryz kúnderi Nur-Sultan qalasynda oflaın formatta ótedi, dep habarlaıdy Almaty-akshamy.kz QR Bilim jáne ǵylym mınıstrliginiń baspasóz qyzmetine silteme jasap.
Bilim jáne ǵylym mınıstrligi alǵash ret ýnıversıtetter men kolejder stýdentteri arasynda BILIM Hackathon 2022 IT baıqaýyn ótkizedi.
Bas júlde ıegerleri 1,5 mıllıon teńge alady. Ekinshi orynnyń júlde qory – 1 mıllıon teńge, úshinshi oryn – 500 myń teńge.
«Jeńimpazdar, ıaǵnı stýdentter, marapattan bólek, jumysqa ornalasý múmkindigine ıe bolady», - dep habarlady Bilim mınıstrliginiń baspasóz qyzmeti.
IT saıys 26-27 naýryzda ótedi. Qazylar alqasynyń quramyna belgili IT-kompanıalar ókilderi kiredi. Úzdik qatysýshylar jumysqa shaqyrý alady.
«Elimizde túrli IT jobalardy ázirleıtin daryndy jastar kóp. Olardy baıqaýǵa qatysýǵa shaqyramyz. Saıysqa ýnıversıtet jáne kolej stýdentteri, odan bólek, basqa da baǵdarlamashylar qatysa alady. Ár oqý ornynan bir komandaǵa qatysýǵa ruqsat etiledi. Hakatonǵa qatysý úshin ótinimderdi monhackathon@gmail.com elektrondy poshtasyna jiberýge bolady. Ótinimge komanda ataýyn, qatysýshylardyń aty-jóni men uıym ataýyn kórsetý qajet», - dedi bilim jáne ǵylym vıse-mınıstri Aıbat İlıasov.
Saıysqa qatysatyn stýdentterge túrli tapsyrma beriledi. Mysaly, erkin taqyrypta da, berilgen taqyryp boıynsha da bilim salasyndaǵy sıfrlyq sheshimder boıynsha joba daıyndaý.
Baıqaý bilim jáne ǵylym salasynda jańa IT jobalarǵa bastamashylyq etý, sondaı-aq qazirgi jáne bolashaq IT mamandardy yntalandyrý maqsatynda ótkiziledi.