Olımpıadaǵa baratyn ulttyq quramanyń kıimi Qazaqstanda tigilmeıdi.
Sportshylarǵa arnalǵan kıim demeýshilerdiń esebinen tigiledi, dep habarlaıdy Almaty-akshamy.kz
«Forma sapaly bolady dep senemiz. Sebebi, qańtarda úlken komısıa quryldy. Onyń ishinde 25 adam boldy. Komısıa quramyna álem jáne Olımpıada chempıondary, qoǵam belsendileri endi. Birinshi kezeńde 8 dızaıner qatysty. Nátıjesinde 6 formanyń eskızin tańdap aldyq. Alaıda onyń arasynda durys forma bolmady. Sondyqtan ekinshi kezeńin uıymdastyrdyq. Nátıjesinde sizderge kórsetken formany tańdap aldyq», - dedi Týrızm jáne sport mınıstri Ermek Marjyqpaev.
Mınıstrdiń aıtýynsha, Qazaqstan sportshylarynyń olımpıadaǵa arnalǵan kıimderin tigýge memleket búdjetinen qarjy bólinbeıdi. Sportshylarǵa arnalǵan kıim tolyqtaı demeýshilerdiń esebinen tigiledi.
«Kıim sapaly bolady. Sport kıimin Ispanıanyń Joma kompanıasy tigedi. Qarjy demeýshiler esebinen bolady. Jalpy, qazir qansha qarjy jumsalatynyn aıta almaımyz. Ázirge naqty somany bilmeımiz, eseptep jatyrmyz. Aldymen Parıj olımpıadasyna qansha sportshymyz joldama alatynyn naqtylap alaıyq. Qazir qanjyǵamyzda 32 lısenzıa bar. Ol – 31 adam. Taǵy 50-70 lısenzıa alamyz degen senim bar. Osyǵan baılanysty qansha qarjy kerektigin qarastyramyz», - dedi mınıstr.