Almaty Ortalyq qalalyq klınıkalyq aýrýhana dárigerleri alǵash ret eki pasıenttiń julynyna jańa qymbat neırostımýlátorlar ornatty.
Jalpy quny 8,5 mln teńgege jýyq turatyn joǵary tehnologıalyq medısınalyq qyzmet MÁMS esebinen jasaldy. Omyrtqasy aýyratyn naýqastardyń dertin jeńildetetin gadjet jaıly aýrýhana neırohırýrgıa bólimshesiniń meńgerýshisi Marat Almatov áńgimelep berdi, dep habarlaıdy almaty-akshamy.kz.
Mamannyń aıtýynsha, mundaı zamanaýı neırostımýlátorlar Qazaqstanda buryn-sońdy qoldanylmaǵan. Júıe Vanta SureScan MRI Medtronic dep atalady.
«Mundaı stımýlátorlar omyrtqasy sozylmaly túrde aýyratyn pasıentter úshin taptyrmas qurylǵy. Otadan keıin olar aýrýyn umytyp, birden burynǵy qalypty ómirge oralady. Vanta SureScan MRI Medtronic - eń sońǵy úlgidegi, jetildirilgen, aqyldy júıe. Biz buryn ornatyp júrgen qurylǵynyń dachıkteri ýaqyt óte kele aýyrsynýdy basý qabiletinen aıyrylyp qalatyn. Onyń ústine, bul stımýlátor pasıentke avtomatty túrde rettep deneni kez kelgen qalypta ustaýǵa múmkindik beredi. Buǵan deıin emdelýshiler dene qalpyn ózgertkende aýyrsynýdy sezinetin», - deıdi dáriger.
Jańa qurylǵyny is júzinde synap kórý baqyty kóp jyldan beri omyrtqanyń degeneratıvti aýrýyna shaldyqqan elimizdiń aımaǵynan kelgen eki turǵynǵa buıyrdy.
Emdelýshiniń ekeýinde de Failed Back Surgery Syndrome - FBSS-pen baılanysty sozylmaly neıropatıalyq aýyrsyný oryn alǵan. Olar úshin qozǵalý qıynǵa soqqan. Ekeýine de aımaqta buǵan deıin tórt ret sátsiz ota jasalǵan-tyn.
«Ota 2 saǵatqa sozyldy. Biz neırostımýlátorlardy shaǵyn tilik arqyly dál julynnyń ústine ornattyq. Pasıent oıanǵannan keıin birden júıeni iske qostyq. Emdelýshilerge arnaıy qosymsha ornatylǵan smartfon beriledi. Ol arqyly qurylǵyny qajet kezde rettep, qosyp nemese óshirýge bolady», - deıdi Marat Almatov.
Jańa júıede «gıroskop» fýnksıasy bar, baǵdarlama soǵan tigilgen jáne ony smartfonnyń ne planshettiń kómegimen basqarýǵa bolady. Onda omyrtqanyń kez kelgen qalpyn baǵdarlaýǵa bolady. Gıroskop bul júıede omyrtqanyń kez kelgen qalpyn avtomatty túrde tanıdy.
«Júıeniń taǵy bir artyqshylyǵy - stımýlátor naýqasta ómiriniń sońyna deıin qalady. Pasıent otadan keıin qalypty ómir súrýge múmkindik alady deýge bolady. Vanta SureScan MRI Medtronic Qazaqstanda alǵash ret bizdiń aýrýhanada ornatylǵanyn atap ótkim keledi. Stımýlátordyń ózi qymbat. Bir jaqsysy bizdiń elde onyń aqysy MÁMS arqyly tólenedi», - deıdi neırohırýrg.
Dárigerdiń aıtýynsha, aqyldy qurylǵyny ornatýdy ol álemniń myqty neırohırýrgteriniń biri Vladımır Alekseevestiń sheberlik klasy aıasynda úırengen. Búginde ol Mınsk qalasyndaǵy «Belorýs ulttyq neırohırýrgıa ortalyǵynyń» ǵylymı aǵa mamany.