«Jas búrkit» jas sarbazyna mınıstr saǵaty syıǵa berildi
22 sáýir kúni elimizdiń İshki ister mınıstri polısıa general-leıtenanty Marat Ahmetjanov Ulttyq ulannyń Shymkent qalasyndaǵy quramasynda boldy, dep habarlaıdy Almaty-akshamy.kz.
Vedomstvo basshysyn quqyqtyq tártip áskeriniń Bas qolbasshysy general-maıor Erkin Botaqanov, “Ońtústik” óńirlik qolbasshylyǵynyń qolbasshysy general-maıor Talapker Ámireev, 6506 áskerı bóliminiń komandıri polkovnık Baýyrjan Qabylbekov jáne Shymkent qalasynyń ákimi Murat Áıtenov qarsy aldy.
QR Ulttyq ulany 6506 áskerı bóliminiń baspasóz qyzmeti málim etkendeı, is-sapar barysynda mınıstr áskerı bólimniń materıaldyq-tehnıkalyq bazasyn, ınfraqurylymymy men oqý-jattyǵý obektilerin nazarǵa aldy. Sonymen qatar, 6506 áskerı bóliminiń tarıhynan syr shertetin, batyrlardyń erligin nasıhattaıtyn murajaıdyń jaı-kúıimen tanysty.
Marat Ahmetjanov óz sózinde Ulttyq ulannyń eldegi turaqtylyqty saqtaý, azamattar men qoǵam qaýipsizdigin qamtamasyz etý boıynsha asa mańyzdy mindetter oryndaıtynyn atap ótti. Sondaı-aq, Memleket basshysy Qasym-Jomart Toqaev Ulttyq ulan áskerı qyzmetshileriniń atqarǵan jumysyna joǵary baǵa bergenin jetkizdi.
- İshki ister organdary úshin de, Ulttyq ulan bólimsheleri úshin de qańtardaǵy oqıǵalar kúrdeli synaq boldy. Quqyq qorǵaý organdarynyń qyzmetkerleri men Ulttyq ulan áskerı qyzmetshileri qıyn kúnderde aldyńǵy shepte konstıtýsıalyq qurylym men el tynyshtyǵyn qorǵady. Memleket basshysy áskerılerdiń jaýyngerlik daıyndyǵyna, quqyq qorǵaý salasy qyzmetkerleriniń jaýyngerlik daıyndyǵyna aıryqsha mán berip otyr. Sonymen qatar aldyńǵy tolqyn Ulttyq ulannyń ardagerlerine qarap boı túzeýimiz jáne de olarmen qoıan-qoltyq jumys jasaýymyz qajet,- dedi İİM basshysy.
İs-shara barysynda İshki ister mınıstri bólimniń quramynda jasaqtalǵan "Jas búrkit" sporttyq áskerı-patrıottyq klýbynyń qyrandarymen tanysyp, olardyń birine aıryqsha syılyq jasady. Dálirek aıtsaq, polısıa general-leıtenanty Marat Ahmetjanov klýbtyń eń jas múshesine óziniń jeke qol saǵatyn syıǵa tartty.
Kezdesý sońynda elimizdiń bas polıseıi bólim jeke quramynyń aldaǵy isterine sáttilik tiledi.
İshki ister mınıstriniń orynbasary – Ulttyq ulannyń Bas qolbasshysy general-maıor Erkin Botaqanov óz kezeginde Prezıdent pen İshki ister mınıstr tapsyrmalarynyń tolyq kólemde oryndalatynyn atap ótti.