Óńirlik komýnıkasıalar qyzmetinde ótken brıfıńte Qazaqstan Respýblıkasy Ulttyq ekonomıka mınıstrligi Tabıǵı monopolıalardy retteý komıtetiniń Almaty qalasy boıynsha departamentiniń basshysy Ásel Býdeneeva «Investısıaǵa aıyrbas tarıfi» tujyrymdamasynyń artyqshylyqtary týraly aıtty.
Memleket basshysy Qazaqstan halqyna Joldaýynda elimizde elektrmen jabdyqtaý jelileriniń úshten ekisi, jylý komýnıkasıalarynyń 57 paıyzy jáne sýmen jabdyqtaý jelileriniń jartysyna jýyǵy tozyǵy jetkenin aıtty. Tarıfterdi jasandy shekteý elektr jaryǵyn sóndirýge, jazataıym oqıǵalarǵa, sonyń saldarynan azamattardyń densaýlyǵy men ómirine qaýip tóndiredi. Monopolıalyq naryqtarda «Investısıaǵa aıyrbas tarıfi» jańa tarıftik saıasatyna kóshý qajet, dep habarlaıdy Almaty-akshamy.kz.
Prezıdenttiń tapsyrmasyn oryndaý maqsatynda monopolısermen tıisti jumystar júrgizilýde.
Ásel Qorǵanbaıqyzynyń aıtýynsha, qalada tabıǵı monopolıalar men negizgi qorlar jelileri sýbektileriniń tozýy aıtarlyqtaı joǵary. Sýmen jabdyqtaý jáne sý burý salalarynda 50%-dan astam, jylý jáne elektrmen jabdyqtaý salalarynda 60%-dan astam. Aldyn ala málimetter boıynsha, 2029 jylǵa qaraı jeliniń tozýyn 15%-ǵa azaıtýǵa qol jetkizý josparlanýda.
Spıker tarıfke áser etýdi baǵalaý salaǵa baılanysty ekenin túsindirdi, mysaly, sýmen jabdyqtaý jáne sý burý salalarynda, tarıfke qosymsha ınvestısıalardyń úlken áseri bolady dep boljanǵan, óıtkeni «Almaty sý» MKK SHJQ tarıfteri tek Almatyda ǵana emes, búkil Qazaqstan boıynsha eń tómengileriniń qatyrynda bolyp otyr.
Sonymen birge oǵan qondyrǵylar men jelilerdiń tozýy, júrgiziletin jumystardyń qıyndyǵy (jóndeý jáne rekonstrýksıa), salalar boıynsha jumystar men materıaldardyń naryqtaǵy baǵalary da áser etedi.
«Qazirgi ýaqytta jylýmen jabdyqtaý jáne sýdy tazartý salalarynda bir shaqyrym jelini jóndeýdiń quny elektr energıasyn tasymaldaý salasyna qaraǵanda áldeqaıda joǵary ekenin baıqap otyrmyz. Osylaısha, árbir saladaǵy tarıfke jeke áser etedi. Júrgizilip jatqan reformalardan maksımaldy nátıje alý úshin birqatar memlekettik monopolıserdi bir organǵa biriktirýdi kózdeıtin monopolıserdiń qyzmetin retteý tásilderin ózgertý qajet, bul operasıalyq shyǵyndardy ońtaılandyrady jáne ınvestısıalyq tartymdylyqty arttyrady; – dedi Á.Býdeneeva.
Osylaısha, jylý jáne sýmen jabdyqtaý, sý burý júıelerin damytý úshin qarjylandyrýdyń naryqtyq tetikterine tıimdi kóshý arqyly búdjettik sýbsıdıalardan kezeń-kezeńimen bas tartý qajet.
Bul sharalarǵa shyǵyndardy ońtaılandyrý, ınvestısıalyq tartymdylyqty arttyrý jáne tarıfter deńgeıin qaıta qaraý arqyly qol jetkiziletin bolady.
Jelilerdiń tozýyn azaıtý jáne ınvestısıalardy tartý boıynsha qabyldanǵan sharalardyń kútiletin nátıjesi jelilerdegi normatıvtik ysyraptardy, jospardan tys úzilister men apattar sanyn azaıtý, jańartylǵan obektilerdiń qyzmet etý merzimin ulǵaıtý, úzdiksiz qyzmet kórsetýdi qamtamasyz etý bolyp tabylady.
Tutastaı alǵanda, tarıfterdiń negizsiz ósýine jol berilmeıdi, tarıfterdiń ózgerýiniń árbir jaǵdaıy úshin áleýmettik-ekonomıkalyq jaǵdaıdy eskere otyryp, monopolıserdiń qyzmetine jeke baǵalaý júrgiziletin bolady.