Almaty polısıasy keńes berdi.
Qazirgi tańda ǵalamtor jelisiniń damýy men elektrondyq, krıptovalútalyq tólem júrgizýdiń múmkindikteri sebebinen ınternet alaıaqtyq jáne aqparattyq komýnıkasıalyq júıe arqyly urlyq sekildi qylmystar kóbeıgen. Bul týraly Almaty qalalyq polısıa departamentinde málim etti, dep habarlaıdy Almaty-akshamy.kz.
«Osy oraıda azamattardy ınternet qyzmet túrlerin paıdalanýda muqıat bolýǵa shaqyramyz. Kúmán týdyratyn siltemelerdi ashpańyzdar, jeke málimetter (JSN, IBAN, CCV) berilmeýi kerek. Eger sizdiń tólem kartańyzǵa belgisiz tulǵalardan aqsha tússe jáne basqa shotqa aýdarýdy ótinse, dereý ózińizdiń bankińizdiń Call ortalyǵyna nemese quqyq qorǵaý organdaryna habarlańyz. Eger siz belgisiz tulǵanyń suraýyn oryndasańyz, alaıaqtardyń qurbany bolyp qalýyńyz múmkin», – dedi qalalyq polısıa departamentiniń krımınaldyq polısıa basqarmasynyń kıberqylmystarǵa qarsy kúres bóliminiń bastyǵy Igor Pýdovkın.
Bul rette Almaty polısıasy ınternet alaıaqtardan saqtaný joldaryn jarıalady:
- Eshqashan eshkimge ózińizdiń bank kartochkańyzdyń málimetterin, jeke basyńyzdyń málimetterin (jeke kýálik, sýret, tólem kartańyzdyń sýretin, 3 sandyq CCV kodyn) joldamańyz.
- Internet arqyly satyp alynatyn taýarlar úshin aldyn ala tólem jibermeńiz.
- Eger siz jyljymaıtyn múlik, kólik nemese taýar satsańyz tólemderdi qolma-qol alǵan durys.
- Eger taýardyń, kóliktiń nemese jalǵa berý boıynsha habarlandyrýda aldyn ala tólem jasaý kerek ekeni jazylsa jáne baılanys tek WhatsApp jelisi arqyly bolsa, elektrondyq tólem júrgizýdiń esh qajeti joq.
- Túrli messendjerler arqyly sizge siltemeler kelse, ol alaıaqtardyń tuzaǵy bolý ábden múmkin.
- Túrli saıtta banktik kartochkańyzdyń málimetterin jarıalamańyz. Bul sizdiń jeke maǵlumattaryńyzdy alýǵa arnalǵan arnaıy fıshıng saıty bolýy yqtımal.
- Ǵalamtor jelisi arqyly uıymdastyrylatyn utys oıynyna qatyspaýyńyz kerek.
- Úlken paıda ákeletin túrli jobalarǵa aqsha salmańyz. Sizge basqa shetel abonenttik nómiri arqyly habarlasyp, bırjaǵa, krıptovalútaǵa aqsha salýyńyzdy suraýy múmkin.
- Eger sizge banktiń qaýipsizdik qyzmetinen habarlassa, bank qyzmetkerleri sizdiń kartańyzdyń málimetterin nemese qupıa sóz jáne kodty suramaıdy. Alaıaqtar sondaı-aq túrli telefon abonenttik nómirin aýystyryp kórsetetin domen arqyly habarlasýlary múmkin. Mundaı jaǵdaıda telefon tutqasyn qoıa salyńyz.