Almaty oblysynda polıseıleri shamamen 250 mln teńge kóleminde zalal keltirgen aýqymdy ınternet-alaıaqtyq sqemasyn áshkereledi.
Jedel-izdestirý is-sharalarynyń nátıjesinde oblystyq kıberqylmysqa qarsy kúres basqarmasynyń qyzmetkerleri Almaty qalasy men Almaty oblysy aýmaǵynda áreket etken qylmystyq toptyń kúdikti uıymdastyrýshysy men úsh sybaılas dropperdi ustady, dep habarlaıdy aqshamnews.kz Polisia.kz-ke silteme jasap.
– Uıymdastyrýshy nebári 19 jasta, Almaty oblysynyń turǵyny. Tergeý málimetinshe, ol qylmystyq sqemaǵa 2023 jyldyń qazan aıynan beri qatysqan. Aldymen qarapaıym drop retinde bastasa, 2024 jyldyń maýsymynan bastap dropperlerdi basqarýǵa kóshken. 2025 jyldyń qańtarynan bastap kýrator retinde áreket etip, úsh dropperdi basqaryp kelgen, – dep habarlady polısıada.
Urlanǵan qarajatty qolma-qol aqshaǵa aınaldyrý úshin qaskóıler 50-den astam jalǵan tulǵaǵa rásimdelgen banktik qosymshalary bar 30-dan astam mobıldi qurylǵyny paıdalanǵan. Sondaı-aq noýtbýk, Reseı baılanys operatorlaryna tıesili 11 SIM-karta jáne sheteldik qarjy uıymdarynyń banktik kartalary tárkilendi. Aldyn ala esepteýler boıynsha, kýrator qylmystyq áreket barysynda shamamen 10 mıllıon teńge tabys tapqan, al onyń sybaılastarynyń árqaısysy – 3 mıllıon teńgeden. 2025 jyldyń qańtarynda qarapaıym drop retinde jumysyn bastaǵan dropperlerdiń biri keıin kýratordyń senimdi kómekshisine aınalǵan. Ol tek aqshany sheship qana qoımaı, bank esepshottary buǵattalǵan jaǵdaıda basqa droptardy bankterge ertip barǵan. Qylmystyq sqemaǵa qatysy bar barlyq tulǵa ustalyp, Almaty oblystyq polısıa departamentine jetkizildi. Qazirgi ýaqytta qajetti tergeý amaldary júrgizilýde.
– Barlyq qatysýshy men olardyń áreketteri naqty anyqtalǵannan keıin bankterge alaıaqtyq epızodtaryn tirkeý jáne keltirilgen zalal somasyn dál anyqtaý úshin sanksıalanǵan suraýlar joldanatyn bolady, – dep qorytyndylady tártip saqshylary.