Almaty qalasynyń ákimi Darhan Satybaldy Jetisý aýdanyndaǵy jumys saparyn jalǵastyrdy. Qala basshysy Qarasý ózeniniń jaǵalaýyn abattandyrý, mektep qurylysy jáne turǵyn úıdi jańǵyrtý baǵdarlamasymen tanysty, - dep habarlaıdy aqshamnews.kz.
Sapar Kemel shaǵynaýdanyndaǵy kóshkin qaýpi bar aýmaqty aralaýdan bastaldy. Qazir uzyndyǵy 580 metr bolatyn tireý qabyrǵalaryn salý jobasy ázirlenip jatyr.
Sondaı-aq, ákimge Kemel shaǵynaýdanyndaǵy Qarasý ózeniniń jaǵalaýyn kúrdeli jóndeý jobasy tanystyryldy. Jobaǵa balalar jáne sport alańdaryn, amfıteatr, skeıt-park, besedkalar, oryndyqtar, qoqys jáshikteri, art-nysandar, jaryq tirekteri, avtomatty sýarý júıesi, gabıonmen jaǵalaýdy nyǵaıtý, beınebaqylaý ornatý jáne kógaldandyrý kiredi. Jumystar osy aıda bastalyp, kelesi jyldyń sáýir aıynda aıaqtalady dep josparlanýda.
Bıyl aýdanda 26 shaqyrym jol ortasha jóndeýden ótedi, onyń 15 shaqyrymy Kemel shaǵynaýdanynda ornalasqan.
«Buryn da aıtqanmyn – barlyq jol jóndeý jumystaryn jańa oqý jyly bastalǵanǵa deıin aıaqtaý qajet. Aýdan ákimi tikeleı baqylaýǵa alýy kerek», – dep atap ótti Darhan Satybaldy.
Búginde Jetisý aýdanynda 21 memlekettik mektep jumys isteıdi. Alaıda halyq sanynyń ósýi men belsendi qurylysqa baılanysty 4 myńnan astam oqýshy orny jetispeıdi. «Keleshek mektepteri» ulttyq jobasy aıasynda ákimdik jobalyq ofısiniń qoldaýymen Býrýndaı kóshesinde 1 200 oryndyq jańa mekteptiń qurylysy bastaldy. Sol aýmaqta mektep salyp jatqan merdiger kompanıa 4 myń páterlik turǵyn úı keshenin de salyp jatyr, onyń 2,3 myńyn jumysshy jastar men halyqtyń áleýmettik osal toptaryn baspanamen qamtýǵa arnalǵan áleýmettik baǵdarlamalar aıasynda ákimdik satyp almaq. Osyny eskerip, qala basshysy bilim berý nysanynyń qurylysyn barynsha jedeldetýdi talap etti.
«Eger mektepti ýaqytynda tapsyrmasańyzdar – biz áleýmettik baǵdarlamalar úshin páter satyp almaımyz. Eshqandaı sóz bolmaıdy, tapsyrmasańyzdar – satyp almaımyz», – dedi Darhan Satybaldy.
Sondaı-aq, qala ákimi Aınabulaq (Arbat) shaǵynaýdanyndaǵy jáne Maqataev kóshesindegi jaıaý júrginshi joldaryn abattandyrý jáne aǵymdaǵy jóndeý jumystarymen tanysty. Joba aıasynda kógaldandyrý, jaryqtandyrý, jaıaý júrginshi joldaryn tóseý jáne shaǵyn sáýlet nysandaryn ornatý qarastyrylǵan.
Aınabulaq-1 shaǵynaýdanynda qala basshysy «Halyq qatysatyn búdjet» baǵdarlamasy aıasynda aýlalardy abattandyrý jumystaryn tekserdi. Bul baǵytta asfált tóselip, rezeńke jabyn ornatylǵan, sport alańy jańartylǵan, jaryqtandyrý, beınekameralar men shaǵyn sáýlet formalary qoıylyp, kógaldandyrý júrgizilgen.
Sonymen qatar, Darhan Satybaldy 1981 jyldan beri paıdalanylyp kele jatqan jylý jelileriniń qaıta jańǵyrtý jumystarymen de tanysty. Qala ákimi bul jumystardy 2025 jyldyń tamyzyna deıin aıaqtaýdy tapsyrdy.
İssapar sońynda qala basshysy turǵyn úıdi jańǵyrtý baǵdarlamasynyń júzege asyrylý barysymen tanysty. Krylov–Skrábın–Goncharov–Raıymbek dańǵyly kósheleri aralyǵyndaǵy aýmaqta 16 úı súrilip, turǵyndar kóshirilgen, 9 úı salynyp, taǵy 2 úıdiń qurylysy júrip jatyr. Botkın–Qazakov–Goncharov–Skrábın–Raıymbek dańǵyly aýmaǵynda 6 úı súrilip, 3 úı salynǵan jáne tapsyrylǵan, 8 úıdiń qurylysy júrip jatyr, olardyń qurylysy 2027 jylǵa deıin aıaqtalady dep josparlanǵan. Sonymen qatar, jańǵyrtý baǵdarlamasynan tys jeke ınvestısıalar aıasynda 10 eski úı men 11 jeke turǵyn úıdi súrý josparlanǵan.
«100 myń sharshy metr úı salyndy, birde-bir mektep, birde-bir balabaqsha, birde-bir emhana joq. Munyń bárin durys esepteýlerińiz kerek. Arhıtektorymyzǵa bárin qaıta esepteýdi tapsyramyn», – dedi Darhan Satybaldy.
Ol renovasıa baǵdarlamasyn júzege asyrý kezinde ınjenerlik jáne áleýmettik ınfraqurylymǵa túsetin júktemeni eskerý qajet ekenin naqtylady.
Budan bólek, Almaty ákimi aýdan turǵyndarymen kezdesip, olardyń ótinishterin tyńdady. Birqatar máselege ákim orynbasarlary men basqarma basshylary sol jerde túsinikteme berdi. Qalǵan suraqtar hattamaǵa engizilip, aldaǵy ýaqytta iske asyrý úshin baqylaýǵa alyndy.