Ortalyq komýnıkasıalar qyzmetiniń alańynda Instagram jáne Facebook jelilerinde qazaqstandyq mýzykalyq kontenttiń nege qoljetimsiz bolǵany talqylandy.
Bul taqyrypqa qatysty resmı málimdemeni QR Ádilet mınıstrligi Zıatkerlik menshik quqyǵy komıtetiniń tóraıymy Sholpan Ábdireeva jasady, dep habarlaıdy aqshamnews.kz El.kz aqparat agenttigine silteme jasap.
Onyń aıtýynsha, áleýmettik jelilerde mýzykalyq shyǵarmalardy zańdy túrde paıdalaný úshin avtordyń nemese quqyq ıesiniń kelisimi qajet.
Avtorlyq quqyq salasyndaǵy ulttyq zańnama men halyqaralyq konvensıalar mýzykalyq týyndylardy, ásirese ınternet pen áleýmettik jelide paıdalaný úshin avtordyń nemese quqyq ıesiniń ruqsaty bolýy kerektigin naqty belgileıdi. Árıne, zańnamada keıbir jaǵdaılarda avtordyń kelisiminsiz, syıaqy tólemeı paıdalanýǵa ruqsat beretin erkin paıdalaný tártibi bar. Biraq bul jaǵdaılar naqty ári shekteýli túrde rettelgen, – dedi Ábdireeva.
Aıta keteıik, 2023 jyldyń sońynda Meta kompanıasy men qazaqstandyq quqyqty basqarý uıymdary arasyndaǵy kelisim merzimi aıaqtalyp, jańartylmaǵan bolatyn. Sonyń saldarynan Instagram jáne Facebook platformalarynan qazaq ánderi ýaqytsha alynyp tastaldy.
Qazirgi ýaqytta másele sheshimin tapty – jańa kelisimge qol qoıylyp, qazaqstandyq mýzyka platformalarda qaıta qoljetimdi bolmaq. Kelisimshart eki jyl merzimge jasalǵan.