Inklúzıvti qala qaǵıdatyn engizý ári Almatynyń sapaly ınfraqurylymyn damytý qalalyq ákimdiktiń ári bizdiń, ıaǵnı barlyq aýdandyq ákimdikterdiń basty mindeti bolyp tabylady. Bul týraly qala ákimi Erbolat Dosaev Inklúzıvti ortany damytý jónindegi Keńestiń birinshi otyrysynda aıtty, dep habarlaıdy almaty-akshamy.kz.
Qala basshysy ortalyqsyzdandyrýdy eskere otyryp, osy baǵyttaǵy oń ózgeristerdi atap ótti – aýdan ákimderi ınklúzıvti orta qurý úderisine belsendi engizildi. «Biz odan ári ortalyqtandyrýdy jalǵastyramyz, men ókilettiktermen, jaýapkershilikpen jáne qarjylyq resýrstarmen bólisýge daıynmyn. Ótken jyly aýdan ákimderine berilgen ókilettikter qazirdiń ózinde nátıje kórsetti. Biz óz aldymyzǵa órshil maqsat qoıyp otyrmyz, ıaǵnı 2030 jylǵa deıin qala turǵyndaryna qoljetimdilik qajet bolatyn barlyq qalalyq ınfraqurylym nysandarynyń odan ári beıimdelýin pasporttaýdy qamtamasyz etý, bıyl alǵashqy qadamdar jasaǵymyz keledi. Bizde qajetti qarjy resýrstary bar», — dep atap ótti Erbolat Dosaev.
«Men Almaty qalasynyń qarjylyq ınklúzıa jónindegi shtattan tys keńesshi ınstıtýtyn birshama jetildirdim. Biz arnaıy jobalyq komanda qurdyq. Endi osy baǵytta qarqyndy jumys isteýge múmkindigimiz bar, dál osyndaı baılanystyrýshy býyn jetispedi», - dep tolyqtyrdy sózin qala ákimi.
Esterińizge sala keteıik, qalalyq ınfraqurylym nysandaryn pasporttaý alǵash ret Almatyda júrgizilýde. 2023 jyly 7,5 myń nysan qamtyldy. Áleýmettik ınfraqurylymdy beıimdeýdi, atap aıtqanda, emhanalarda, aýrýhanalarda, HQKO-larda pandýstar, qosalqy tutqalar, taktıldi plıtalar ornatýdy 2025 jyldyń sońyna deıin júrgizý josparlanýda. Kelesi jyldyń sońyna qaraı Almatyda áleýmettik nysandardyń 30%-y múmkindigi shekteýli jandarǵa, al 2030 jylǵa qaraı qalalyq nysandardyń 75%-y beıimdeledi.