Búginde Almatyda qala ákimi Erbolat Dosaevtyń tapsyrmasy boıynsha qolǵa alynǵan «Invataksı» qyzmetin aıyna 2 myńnan astam adam paıdalanady, onyń 800-i erekshe qajettilikteri bar balalar.
Ótken jylmen salystyrǵanda bul qyzmetti paıdalanatyndar sany 200 adamǵa ósti. Bul týraly Almaty qalasy ákiminiń orynbasary Ásem Núsipova ınklúzıvti ortany damytý jónindegi Keńestiń birinshi otyrysynda habarlady.
2023 jyldyń qorytyndysy boıynsha ınvataksı qyzmetterin usyný boıynsha pılottyq joba qolǵa alynǵan kezde avtomobılder sany 64-ten 100-ge deıin ulǵaıtyldy. Ásem Núsipovanyń aıtýynsha, mundaı shara arnaıy kólikterdiń júktemesin azaıtýǵa múmkindik berdi.
Qala basshysynyń orynbasary Almaty ákimdigi QR Eńbek jáne áleýmettik qorǵaý mınıstrligine agregatorlar bóliginde ınvataksı qyzmetterin usyný qaǵıdalaryna ózgerister engizý týraly bastamashylyq hat joldanǵanyn aıtty.
«Qazirgi ýaqytta taksı agregatorlarynyń áleýmettik qyzmetter portaly arqyly jiberilgen qyzmetterdi usynýy múmkin emes, osyǵan baılanysty qoldanystaǵy áleýmettik tapsyrystar arqyly qyzmetterdi usynýdy qosymsha pysyqtaýǵa týra keledi», - dep naqtylady Ásem Núsipova.