Memleket basshysy jarıalaǵan «Jumysshy mamandyqtary jyly» aıasynda ekonomıkada suranysqa ıe salalar boıynsha mamandar daıarlaýǵa erekshe nazar aýdarylyp otyr. Bul týraly ǵylym jáne joǵary bilim mınıstri Saıasat Nurbek habarlady.
Onyń aıtýynsha, bıyl mektepti 216 myń túlek támamdap, joǵary bilimge qadam basty. Súıinshi jańalyq — dál osy jyly bólingen memlekettik bilim berý granttarynyń 60%-dan astamy ınjenerlik jáne tehnıkalyq mamandyqtarǵa baǵyttalǵan. Jalpy bakalavrıat deńgeıinde 78 myńǵa jýyq grant, al magıstratýra men doktorantýraǵa 93 myńnan astam grant bólingen. Eń joǵary suranysqa ıe úsh baǵyt boıynsha: pedagogıkaǵa — 13 myń, aqparattyq tehnologıalar men jasandy ıntellektke — 11 myń, al ınjenerlik salaǵa — 18 myńnan astam grant bólinip otyr.
Mınıstr atap ótkendeı, bıyldan bastap sırek jáne qajetti mamandyqtarǵa — veterınarıa, energetıka, sý sharýashylyǵy, ırrıgasıa, gıdrotehnologıalar sekildi salalarǵa óńirlik kvotalar engizildi. Bul kvotalar endi ár óńirdiń naqty ekonomıkalyq qajettiligine saı bólinedi. Mysaly, byltyr ashylǵan Qazaq ulttyq sý sharýashylyǵy jáne ırrıgasıa ýnıversıteti bıyldan bastap qoldaý retinde osy baǵyttaǵy arnaıy kvotalardy alyp otyr.
Jańa engizilgen mańyzdy bastamalardyń biri — áskerı boryshyn ótep kelgen azamattarǵa arnalǵan bilim berý granttary. Qorǵanys mınıstrligimen birlesken jumystar nátıjesinde bıyl tuńǵysh ret áskerı boryshyn ótegen jastarǵa 2 myńǵa jýyq grant bólindi. Bul shara azamattardy áskerı qyzmetke yntalandyrý maqsatynda qolǵa alyndy.
Sonymen qatar, ata-anasynan aıyrylǵan jetim balalar men áleýmettik osal toptardan shyqqan talapkerler úshin de arnaıy kvotalar qarastyrylǵan. Taǵy bir jaǵymdy jańalyq — bıyl «Serpin» baǵdarlamasy aıasynda buryn-sońdy bolmaǵan nátıje tirkeldi: granttardyń 83%-y ıgerildi. Bul kórsetkish buǵan deıin 40–50% deńgeıinde bolǵan bolsa, byltyr 67%-ǵa jetken edi. Qazir baǵdarlama aıasynda jastar elimizdiń 9 óńirinde bilim alyp jatyr.