10 tamyzda Almatydaǵy Ortalyq stadıonda álemdik juldyz Djennıfer Lopestiń konserti ótedi. Osyǵan baılanysty qalada qoǵamdyq kóliktiń qosymsha baǵyttary, arnaıy kireberis aımaqtary uıymdastyrylyp, avtokólik qozǵalysyna ýaqytsha shekteý engiziledi. Qalalyq qyzmetter kórermenderden marshrýttaryn aldyn ala josparlap, tártipti saqtaýdy suraıdy.
20 myńnan asa kórermen jınalady dep kútiledi. Adam aǵynyn tıimdi úılestirý maqsatynda volonterler tartylyp, navıgasıa júıesi kúsheıtildi. Stadıon aýmaǵynda metaldetektorlar, LED-ekrandar jáne beınebaqylaý kameralary ornatyldy. Barlyq bıletter jalǵandyqtyń aldyn alý úshin sıfrlyq tekseristen ótedi.
Stadıonǵa kirýdi uıymdastyrý
Aýqymdy konsertke baılanysty Ortalyq stadıonǵa kirý saǵat 15:00-den bastap ashyq bolady. Negizgi is-shara saǵat 19:00-de bastalady.
Uıymdastyrýshylar kórermenderge konsert bastalǵanǵa deıin birneshe saǵat buryn kelýdi usynady, bul kezekterdiń, kireberis toptaryndaǵy adam shoǵyrlanýy men ótkelderdegi keptelisterdiń aldyn alý úshin mańyzdy. Qaýipsizdik pen jaılylyq – árdaıym basty nazarda.
Negizgi juldyz sahnaǵa shyqqanǵa deıin Qazaqstan estradasynyń tanymal oryndaýshylarynyń qatysýymen mazmundy konserttik baǵdarlama ótedi. Olar stadıonǵa kelgen alǵashqy mınýttardan-aq merekelik kóńil-kúı syılaıdy.
Negizgi kirý aımaqtary:
• Abaı dańǵyly jaǵynan:
5-qaqpa – 2–18 sektorlar
6-qaqpa – 19–25 sektorlar, fan-aımaq jáne bı alańy
• Baıtursynuly kóshesi jaǵynan: 1 jáne 2-qaqpa (otyratyn sektorlar)
• Satpaev jáne Shaǵabýtdınov kósheleri jaǵynan: sahna men bı aımaǵyna ótetin kórermender
• Bólek kireberis: zeınetkerlerge, múmkindigi shekteýli jandar men júkti áıelderge arnalǵan
Stadıon aldynda volonterler baǵyt-baǵdar kórsetý, belgiler arqyly baǵdarlaý jáne kirý úderisin uıymdastyrý boıynsha kómek kórsetedi. Stadıon aınalasynda fýd-korttar men aýyz sý taratý pýnktteri jumys isteıdi.
Anyqtama úshin:
• VIP Standing – Ońtústik trıbýna, 4-qaqpa (Satpaev kóshesi jaǵynan)
• Fan Zone, Dance Floor, Free Zone – Soltústik trıbýna, 6-qaqpa (Abaı dańǵyly jaǵynan)
• Sektorlar 26–28, 30–32, 40–42 – Shyǵys trıbýna, 1-qaqpa (Baıtursynuly kóshesi jaǵynan)
• Sektorlar 33–36, 43–47 – Shyǵys trıbýna, 2-qaqpa (Baıtursynuly kóshesi jaǵynan)
• Sektorlar 2–9, 11–18 – Soltústik trıbýna, 5-qaqpa (Abaı dańǵyly jaǵynan)
• Sektorlar 19–22, 24, 25 – Soltústik trıbýna, 6-qaqpa (Abaı dańǵyly jaǵynan)
Mańyzdy: kirý kezinde ótkizý belgisin alý mindetti. Onsyz is-shara aýmaǵyna kirýge bolmaıdy.
Keńes: stadıon sqemasymen aldyn ala tanysyp shyǵý usynylady – bul kireberiste adam shoǵyrlanýyn azaıtady.
Stadıon mańyndaǵy qozǵalys shekteýleri
10 tamyzda saǵat 14:00-den bastap kelesi kóshearalyq perımetrde avtokólik qozǵalysy ishinara shekteledi: Abaı dańǵyly – Baıtursynuly kóshesi – Muqanov kóshesi – Satpaev kóshesi
«Qala turǵyndary men qonaqtarynan qozǵalys baǵytyn aldyn ala josparlaýdy suraımyz. Bul ýaqytsha shekteýler is-sharanyń uıymdasqan ári qaýipsiz ótýin qamtamasyz etýge baǵyttalǵan», – dep habarlady Almaty qalasynyń mobıldilik basqarmasy.
Tegin transfer: arnaıy avtobýs baǵyttary
Konsert qonaqtarynyń yńǵaıy úshin Almaty qalasy Ortalyq stadıonǵa deıin jáne keri qaıtý baǵytynda tegin avtobýstar uıymdastyrylady.
Shattl avtobýstary kelesi ýaqyttarda júredi: 15:00, 15:45, 16:30, 17:15 jáne 18:00.
Stadıonǵa jóneltý baǵyttary:
• Halyk Arena – Halyq Arena aıaldamasy
• Qalqaman – №7 qalalyq aýrýhana aıaldamasy
• Orbıta / Toraıǵyrov pen Mustafın qıylysy – Demırel koleji aıaldamasy
• Raıymbek / Alataý – Jakıbaev aıaldamasy
• Almaty-1 temirjol vokzaly – JD vokzal–1 aıaldamasy
• Almaty Arena – Almaty Arena aıaldamasy
Árbir jóneltý núktesinde volonterler kezekshilik etip, kórermenderge baǵyt kórsetedi, avtobýstarǵa uıymdasqan túrde otyrǵyzýǵa kómektesedi.
KONSERTTEN KEIİN QAITÝ BAǴYTY (avtobýstar tolyǵýyna qaraı júredi):
• Satpaev kóshesi – Qalqaman
• Baıtursynuly kóshesiniń batys jaǵy – Orbıta
• Baıtursynuly kóshesiniń shyǵys jaǵy – Almaty-1 vokzaly
• Abaı dańǵylynyń ońtústik jaǵy – Halyq Arena
• Abaı dańǵylynyń soltústik jaǵy – Almaty Arena jáne Raıymbek / Alataý
Bul sheshim konsertten keıingi qozǵalysty retteýge, qaladan yńǵaıly jáne qaýipsiz qaıtýǵa múmkindik beredi.