Almaty qalasyndaǵy ınjenerlik ınfraqurylymnyń jaı-kúıi de Prezıdent nazarynan tys qalmady, dep habarlaıdy Almaty-akshamy.kz.
Memleket basshysynyń aıtýynsha, elimizdegi eń basty syn-qaterdiń biri – sapaly aýyzsýmen qamtamasyz etý. Tájirıbe kórsetkendeı, Almatyda da bul turǵyda jaǵdaı máz emes. Prezıdenttiń aıtýynsha, shaharda sýdyń úzdiksiz berilýine kedergi keltiretin apatty jaǵdaılar tym jıilep ketýi sýmen qamtamasyz etý salasyndaǵy problemalardy kezek kúttirmeı sheshý qajet ekenin kórsetedi. Qasym-Jomart Toqaev sońǵy kezde sel júrip, ózen sýlarynyń laılanýy jıilep ketkeni alańdaýshylyq týǵyzatynyn aıtty. Sonyń saldarynan shilde aıynyń sońynda komýnaldyq qyzmetter qalanyń joǵarǵy bóligindegi aýdan turǵyndaryna sý berýdi shekteýge májbúr boldy. Medeý aýdanyndaǵy 50 kóppáterli úı men 4 myńnan astam jeke turǵyn úı sýsyz qaldy. Bul turǵyndardyń oryndy narazylyǵyn týǵyzdy. Prezıdent elimizdiń eń úlken shaharyndaǵy sý sharýashylyǵyn retke keltirý úshin atqarylýǵa tıis negizgi mindetterdi aıqyndap berdi.
Atap aıtqanda, Úkimet pen qala ákimdigine merdigerlerdiń kinásinen keshiktirilgen Qarǵaly sý jınaqtaý nysanyn bıyl qazan aıynyń sońyna deıin paıdalanýǵa berý;
qalanyń sý sharýashylyǵyna tolyq tekseris jasaý jáne Almatynyń joǵarǵy bóligin sýmen tolyq qamtý úshin jerasty sý kózderine gıdrogeologıalyq barlaý jumystaryn júrgizý,
sondaı-aq «Balqash» stansıasyndaǵy rezervýar men tórt skvajınanyń qurylysyn aıaqtaý mindetteri júkteldi.