Qazaqstannyń damý boljamy jarıalandy.
Boljam boıynsha 5 jyl ishinde JİÓ-niń ortasha jyldyq ósýi 5,8%-ti quraıdy, dep habarlaıdy Almaty-akshamy.kz
Ulttyq ekonomıka mınıstri Álibek Qýantyrov eldiń 2024–2028 jyldarǵa arnalǵan áleýmettik-ekonomıkalyq damý boljamynyń jobasyn usyndy.
Onyń aıtýynsha, syrtqy parametrlerdiń ózgerýine baılanysty damýdyń úsh senarıi qaraldy.
"Bazalyq senarı kezinde munaıdyń ortasha baǵasyn barreline 80 dollar deńgeıinde alý usynylady. Boljam boıynsha 5 jyl ishinde JİÓ-niń ortasha jyldyq ósýi 5,8%-ti quraıdy. Inflásıa 2024 jyly 6-8%, 2025 jyly 5,5-7,5% deńgeıinde aıqyndaldy, keıinnen 2026–2028 jyldary 5%-ke deıin tómendeıdi", - deıdi Qýantyrov úkimet otyrysynda.
2024 jyly JİÓ-niń naqty ósimi 5,3%-ti quraıdy, keıin 2028 jyly 6%-ke deıin ósedi. Nomınaldy JİÓ 2024 jylǵy 135 trln teńgeden 2028 jyly 218,5 trln teńgege deıin ulǵaıady.
Ekonomıkanyń barlyq bazalyq salasynda ósim boljanyp otyr. Máselen, ónerkásipte ortasha jyldyq ósý qarqyny 4%-ti, onyń ishinde óńdeý ónerkásibinde – 4,9%-ti, taý-ken óndirý ónerkásibinde – 3,1%-ti quraıdy.
Aýyl sharýashylyǵynyń jalpy ónim kóleminiń ortasha jyldyq ósimi 4,5%-ti quraıdy. Qurylys salasyndaǵy boljamdy ósim orta eseppen 8,8%, saýdada – 7,4%.
Eksport kólemi 2024 jyly 83,1 mlrd dollardan 2028 jyly 94,8 mlrd dollarǵa deıin ulǵaıady, ımport 60,7-den 65,6 mlrd dollarǵa deıin ósedi.