Almaty ákimi Erbolat Dosaev Almaly aýdany turǵyndarymen kezdesti.
Halyqpen ótken jıynda turǵyndar qala basshysyna ózderin tlǵandyrǵan saýaldaryn qoıdy, dep habarlaıdy Almaty-akshamy.kz
Almaly aýdany turǵynynyń suraǵy: Qalamyzdyń saıabaqtarynda polısıa býdkasy bar, biraq polıseıler nege sol jerden shyqpaıdy, saıabaqtardy teksermeıdi? Mysaly, Gandı atyndaǵy saıabaqta shashylǵan shprıster óte kóp. Ári ol jerde esirtki taratýshylar júredi. Polıseılerdiń mindeti ne, nege olar býdkasynan shyqpaıdy?
Almaty polısıa departamentiniń bastyǵy Arystanǵanı Zapparovtyń jaýaby: Joq, bul olaı emes. Modýldik posttaǵy árbir ınspektordyń aýmaqty aralaıtyn belgili bir ýaqyty bar. Eger shashylǵan shprısterdi kórseńiz nemese esirtki jasyrylǵan jerlerdi bilseńiz, polısıaǵa habarlasyńyz. Biz shara qoldanamyz. Sonymen qatar, bizde senim telefony bar, Polısıa departamentiniń Esirtki qylmysyna qarsy is-qımyl basqarmasy bar. Aıta keterligi, Almaty respýblıka boıynsha sıntetıkalyq jáne basqa da esirtkilerdi tárkileý boıynsha birinshi orynda tur. Bul indetpen kúreste bir ǵana tártip saqshylarynyń kúshi jetpeıdi, sondyqtan polısıaǵa habarlasyńyzdar.
Almaty ákimi Erbolat Dosaevtyń jaýaby: Turǵyndardyń qaýipsizdigi úshin polısıa basqarmasy aýdan ákimimen birlesip saıabaqtarda tekseris júrgizýi kerek. Eń kóp saıabaq Almaly aýdanynda ornalasqan.
Juma kúni biz polısıanyń servıstik ortalyqtaryn qurý jóninde ishki ister mınıstrimen kezdestik. Qazirdiń ózinde bul jobany iske asyryp jatyrmyz. Biz úshin eń bastysy, polısıanyń syrtqy kelbeti emes, kimniń, qalaı jumys isteıtini mańyzdy. Tekseris júrgizemiz be, álde basqa joly bar ma, qoǵamdy ne isteý kerektigin birlesip sheshýge shaqyramyn. Saqshylar býdkada otyra bermeı, syrtqa shyǵyp tóńirekti baqylaýy kerek. Almaly aýdany polısıa basqarmasynyń bastyǵyna jospar jasaýdy tapsyramyn, bir aıdan keıin neniń qalaı ózgeretinin kóremiz.