Qalaaralyq jolaýshylardy tasymaldaıtyn taksı qyzmetine talap qatańdaı túspek, dep habarlaıdy Almaty-akshamy.kz QazAqparatqa silteme jasap.
«Jol qaýipsizdigin qamtýdaǵy taǵy bir problema – jolaýshylardy zańsyz tasymaldaýshylar (ındraıver, ıandeks taksı qyzmeti). Taksıster paıda tabý úshin toqtaýsyz, uıqysyz jáne demalyssyz qalalar arasynda qatynaıdy. Jol qaýipsizdigi úshin bul – qaýipti. Keıbir kólikter tozǵan, uzaq jolǵa shydamaıdy. Taksı júrgizýshileri adamdardy tasymaldaýda jol erejeleri talaptaryn oryndamaıdy», - dedi İshki ister birinshi vıse-mınıstri Marat Qojaev Úkimet otyrysynda.
Osy oraıda mınıstrlik zańsyz tasymaldaıtyn qalaaralyq taksı júrgizýshilerine talapty kúsheıtpek.
«Jolǵa shyǵar aldynda medısınalyq jáne kúndelikti avtokólikti tekserý, jylyna 2 ret - tehnıkalyq baıqaýdan ótý, sondaı-aq júrgizýshiniń rólde 8 saǵattan artyq otyrmaýyn qarastyrý kerek», - deıdi ol.