Elimizde jol ústinde kúnine orta eseppen 5-6 adam qaza tabady.
Mundaı derek QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda keltirildi, dep habarlaıdy Almaty-akshamy.kz.
Otyrysta jol qozǵalysy qaýipsizdigin qamtamasyz etý sharalary qaraldy.
İshki ister mınıstriniń birinshi orynbasary Marat Qojaev bıyl jol-kólik oqıǵalarynyń negizgi kórsetkishteriniń tómendegenin aıtty: jol-kólik oqıǵalary – 13%-ǵa (8 253-ten 9 429-ǵa), zardap shekkender sany – 16%-ǵa (12 394-ten 10 448-ge deıin), qaza tapqandar – 1%-ǵa (1478-den 1468-ge deıin). Degenmen, jalpy oń dınamıkaǵa qaramastan, Almaty qalasy, Jambyl, Túrkistan, Almaty, Jetisý oblystarynda apattar deńgeıi áli de joǵary.
Sonymen qatar bıyl 5,5 mln-nan astam jol qozǵalysy erejesin buzýǵa tosqaýyl qoıylǵany, 15 myńǵa jýyq mas kúıdegi júrgizýshi ustalǵany, 9 myń adamnyń kólik júrgizý quqyǵynan aıyrylǵany, 15 myń adamnyń ákimshilik qamaýǵa alynǵany, 215 myńnan astam jaıaý júrginshige aıyppul salynǵany atalyp ótti.
Marat Qojaev İİM-niń emtıhandardy qabyldaý erejesine ózgerister engizgenin atap ótti: endi emtıhan tapsyrý prosesi onlaın-translásıa arqyly baqylanady, «Avtomektep» aqparattyq júıesinde bilim alýshylardy mindetti tirkeý normasy engizildi. Nátıjesinde tizimderdi túzetý múmkindigi alynyp tastalady.
Qazirgi ýaqytta túzetýlerdiń ekinshi paketi ázirlendi. Daıyndyq kýrstaryn aıaqtaý týraly kýálikterdi jáne medısınalyq anyqtamalardy elektrondyq nysanǵa kóshirý josparlanýda. Sonymen qatar júrgizýshilerdiń óz betinshe daıyndalýyn alyp tastaý máselesi pysyqtalýda.
Budan bólek, ákimdikterdiń qoldaýymen jol qozǵalysy qaýipsizdigin qamtamasyz etý salasyna sıfrlyq sheshimderdiń belsendi túrde engizilip jatqany aıtyldy. Qazir joldarda jol erejesin buzǵandardy avtomatty túrde tirkeıtin 22 myń kamera ornatylǵan. Olardyń kómegimen barlyq buzýshylyqtardyń 50%-y tirkeledi. Astana men Shymkentte bul kórsetkish 70%-ǵa deıin ósti. Mundaı júıelerdi óńirlerde engizý jumystary jalǵasyp jatyr.
Sonymen qatar «Qorǵaý» baǵdarlamasy arqyly turaqty túrde tártip buzatyndarǵa shara qoldanylýda. Ol jalǵan nómirli, saqtandyrýsyz, izdeýde júrgen nemese jol erejesin buzyp, aıyppul tóleýden jaltarǵan kólik júrgizýshilerin avtomatty túrde anyqtaýǵa múmkindik beredi.
Sondaı-aq tótenshe jaǵdaılar mınıstri Syrym Sháriphanov pen kólik mınıstriniń mindetin atqarýshy Talǵat Lastaev baıandama jasady.
Premer-Mınıstr Almaty oblysynda jol ústindegi ólim-jitim kórsetkishi eń joǵary, Túrkistan oblysynda jol-kólik oqıǵalary, qaza tapqandar men zardap shekkender sany artqanyn, al Abaı oblysynda jalpy apat deńgeıiniń 2 esege jýyq óskenin atap ótti. Osy máseleler boıynsha oblys ákimderi Marat Sultanǵazıev, Darhan Satybaldy jáne Nurlan Uranhaev túsinikteme berdi.
Úkimet basshysy bıyl jol-kólik oqıǵalary men zardap shekkenderdiń sany birshama tómendegenin atap ótti. Dese de jol ústinde kúnine orta eseppen 5-6 adam qaza tabady.
«Ár sıfrdyń artynda qanshama jannyń ómiri men densaýlyǵy tur. Ókinishke qaraı, bizde kólik júrgizý mádenıeti men tártip deńgeıi óte tómen. Biz joldaǵy quqyq buzýshylyqtar úshin qylmystyq jáne ákimshilik jaýapkershilikti qatańdatyp kelemiz. Soǵan qaramastan, polısıa jol boıynda mas kúıde rólge otyrǵan jáne buryn kólik júrgizý quqyǵynan aıyrylǵan myńdaǵan júrgizýshini ustaıdy. Árıne, mundaı zań buzýshylarǵa barynsha qatań shara qoldaný kerek», — dedi Álıhan Smaıylov.
Onyń aıtýynsha, eldi mekenderdegi kameralar sanyn kóbeıtip, respýblıkalyq mańyzy bar avtojoldarda aparattyq-baǵdarlamalyq keshenderdi belsendi paıdalaný kerek.
Premer-Mınıstr jol qaýipsizdigine qatysty jaǵdaı halyqtyń oryndy narazylyǵyn týdyryp otyrǵanyn atap ótti. Jyl basynan beri azamattardan jol qozǵalysyna qatysty 62 myńnan astam resmı shaǵym kelip tústi. Olardyń bári aldyńǵy TOP-10 shaǵymdar qatarynda tur.
Máselen, júrgizýshi kýáligin alý emtıhandaryn tapsyrý kezindegi jemqorlyq áreketteri de qoǵam tarapynan jıi synǵa ushyraıdy. Avtokólik quraldaryn tehnıkalyq tekserý sapasyna qatysty suraqtar kóp. Sondaı-aq jol-kólik apattaryna sebepshi negizgi máseleniń biri – tıisti deńgeıdegi jol ınfraqurylymynyń bolmaýy.
«Áli kúnge deıin eldi-mekenderde jaryǵy, jaıaý júrginshiler ótetin jerleri men baǵdarshamdary joq jol ýchaskeleri kezdesedi. Osynyń bári qaıǵyly jaǵdaılarǵa, onyń ishinde balalar arasyndaǵy ólim-jitimge ákep soǵýda. Sondyqtan, jol qaýipsizdigin arttyrý, jol apattary men ólim-jitim deńgeıin azaıtý jónindegi júıeli sharalardy ázirleý bizdiń basty mindetimiz bolyp tabylady», — dedi Álıhan Smaıylov.
Osyǵan baılanysty Úkimet basshysy árbir óńir bólinisinde jol apattaryna jan-jaqty taldaý júrgizýdi jáne jol apattary jıi bolatyn ýchaskelerde jol qozǵalysyn qadaǵalaýdy kúsheıtýdi tapsyrdy.
«Sondaı-aq júrgizýshilerdiń óz betinshe daıyndalý múmkindigin alyp tastaý máselesin pysyqtaý qajet. Bul qadam tıisti nátıje bergen joq. Sıfrlandyrý mınıstrligimen birlesip, júrgizýshi kýáligin alý emtıhandarynyń sapaly ótkizilýin qamtamasyz etý kerek», — dedi Álıhan Smaıylov.
Qorytyndylaı kele, ol jekemenshik taksıdiń, ásirese qalaaralyq baǵyttardaǵy taksı qyzmetin retteý jóninde qosymsha sharalar qabyldaýdy, kólik quraldaryn tehnıkalyq tekserýden ótkizý sapasyn tıimdi baqylaý mehanızmin ázirleýdi, zań buzýshylyqtardy tirkeý kameralarynyń sanyn kóbeıtý jáne trassalyq medısınalyq-qutqarý pýnktterin damytý, onyń ishinde mobıldi jyljymaly brıgadalar qurý jóninde sharalar qabyldaýdy tapsyrdy.