İndet eshkimdi aıamaýda.
Qurama Shtattarda "delta" shtamymen aýyrǵandardyń sany kúrt artty, dep habarlaıdy Almaty-akshamy.kz. 24.kz-silteme jasap.
AQSH-tyń aýrýlardy baqylaý jáne aldyn alý ortalyǵynyń mamandary vaksınalaýdyń qarqyny tómendegenin aıtyp, halyqty ekpe alýǵa shaqyrdy. Eldiń keıbir shtattarynda delta shtamymen aýyrǵandardyń sany kúrt ósip keledi jáne aýrýhanaǵa túskenderdiń kórsetkishi 31 prosentke artty.
Vaksınalaý qarqynynyń báseńdeýine birneshe faktor áser etip otyr. Sonyń biri áleýmettik jelilerdegi jalǵan aqparattyń taralýy deıdi sarapshylar. Dálirek aıtqanda, «Djonson end Djonson» vaksınasynyń «Guillain barre» ataýymen belgili nevrologıalyq sındromnyń asqynýyna alyp keledi» degen qaýeset shyndyqqa janaspaıdy» deıdi sala mamandary. Aıtýlarynsha, kovıd vaksınasy ondaı aýrýdy týǵyzady degen naqty dálel joq. Prezıdent Baıdenniń ózi osyndaı jalǵan aqparat taratyp jatqan áleýmettik kompanıalardy synǵa aldy.
- Olar adamdardyń ólimine sebepker bolyp jatyr. Vırýs ásirese vaksına almaǵandarǵa juǵyp jatyr. Iaǵnı qaıǵyly jaǵdaıǵa solar kináli, dedi AQSH Prezıdenti Djo Baıden.
Buǵan deıin, Aq Úı basshysy shildeniń basyna deıin 70 prosent amerıkandyqty vaksınalaýdy dittegen edi. Qazir amerıkandyqtardyń 48 prosentten astamy ǵana nemese 160 mln adam tolyqtaı vaksınalanǵan. Sarapshylardyń aıtýynsha, maska taǵý men vaksına alýǵa degen nemquraılyq indetti jeńýge qıyndyq týdyrýda. Osy ýaqytqa deıin AQSH halqynyń 34 mln kovıd indetin juqtyryp, 600 myńy qaıtys boldy.