Parlament palatalarynyń birlesken otyrysynda Premer-mınıstr Oljas Bektenov sheteldik aýyl sharýashylyǵy tehnıkasyna lızıń berý nege toqtatylǵanyn aıtty, dep habarlaıdy almaty-akshamy.kz.
«Aýyl sharýashylyǵyn aıtsaq, egis jumystaryn qarjylandyrý bıyl 4 ese ósti. Iaǵnı, 540 mlrd teńge dıqandarǵa jiberildi. Oǵan qosa jańa lızıńtik baǵdarlamaǵa 100 mlrd teńge jiberildi. Ol baǵdarlama arqyly aýyl sharýashylyǵy tehnıkasyn satyp aldy. Aýyl sharýashylyǵy tehnıkasyn aıtsaq, biz bıyl ımporttyq tehnıkaǵa beriletin sýbsıdıalardy toqtattyq. Bizdiń pikirimizshe, biz ózimizdiń búdjet qarajatymyzdyń esebinen basqa eldiń emes, tek óz óndirýshilerimizdi qoldaýymyz qajet. Jalpy otandyq óndirýshilerdi qoldaý baǵytyna keler bolsaq, bul men basqaryp otyrǵan Úkimettiń negizgi basymdyqtarynyń biri», - dedi Premer-mınıstr.
Sondaı-aq ol bıyl 6,5 myń shaqyrym komýnaldyq jeli jóndeletinin atap ótti.
«Avtomobıl joldaryna toqtalsaq, bıyl 12 myń shaqyrym avtomobıl jolda qurylys, kúrdeli jóndeý jáne jóndeý jumystary júrgiziledi. Bul – úlken kórsetkish. Bıyl 13 arnaıy ekonomıkalyq jáne ındýstrıaldyq aımaq qajetti ınfraqurylymmen qamtamasyz etiledi. Bul – kóp ındýstrıaldyq jobalardy iske qosýǵa múmkindik beretin qadam. 1 800 shaqyrym gaz qubyry salynady. Ol degenimiz 300 myń turǵyny bar 67 eldi meken bıyl gazǵa qol jetkizedi degen sóz. 6,5 myń shaqyrym komýnaldyq jeli jóndeýden ótkiziledi. 70 jańa ınvestısıalyq joba iske qosylady. Ol shıkizat emes, joǵary óńdelgen taýar óndirýge baǵyttalady. Sondyqtan biz ony qoldap jatyrmyz», - dedi Oljas Bektenov.