Dırektor bolǵan tulǵalar qyzmetin toqtatty.
Kásipker Ilon Mask 27 qazanda Twitter kompanıasyn satyp alǵannan keıin dırektorlar keńesin taratty. Bul týraly dúısenbi kúni AQSH Baǵaly qaǵazdar jáne bırjalar jónindegi komısıasynyń (SEC) bazasynda jarıalanǵan qujattarda aıtylǵan, dep habarlaıdy Almaty-akshamy.kz QazAqparatqa silteme jasap.
«27 qazanda birigý týraly kelisim nátıjesinde Mask myrza Twitter-diń jalǵyz dırektory boldy. Mámile aıaqtalǵan sátte birigý jónindegi kelisimniń talaptaryna sáıkes osyǵan deıin dırektor bolǵan tulǵalar qyzmetin toqtatty», - delingen qujattardyń birinde.
Áleýmettik jeliniń negizin qalaýshylardyń biri Djek Dorsı kompanıadaǵy aksıasynyń 2,4% úlesin saqtap qaldy. Qazirgi ýaqytta onyń jalpy naryqtyq quny shamamen 1 mıllıard dollardy quraıtyn 18 mıllıonnan astam aksıasy bar.
Buǵan deıin Mask Twitter-di satyp alǵannan keıin kompanıa basshylyǵynyń birneshe múshesin, sonyń ishinde bas dırektor Paraga Agraval men qarjy dırektory Ned Segaldy jumystan shyǵarǵany habarlanǵan bolatyn.