Almatynyń "Zerdeli" yqshamaýdanyndaǵy qurylysy bitpegen eki turǵyn úıdi súrýge jergilikti búdjetten 1 mıllıard 400 mıllıon teńge bólingen.
Bul týraly qalalyq qurylys basqarmasynyń mamandarynan málim boldy, dep habarlaıdy Almaty-akshamy.kz 24.kz saıtyna silteme jasap.
Yqshamaýdan alǵashynda «Alǵabas-6» dep atalǵan. Buǵan deıin qala ákimi Erbolat Dosaev, Qazaq qurylys jáne sáýlet ǵylymı-zertteý jáne jobalaý ınstıtýtynyń saraptamasy negizinde salynyp bitpegen toǵyz qabatty eki ǵımarattyń buzylatynyn aıtqan edi. Sebebi qurylys talapqa saı júrgizilmegen. Merdiger kompanıa jaýapsyz mekeme tizimine engizilip, sot sheshimimen búdjetke 140 mıllıon teńge óndirilgen. Ákimdik ókiliniń aıtýynsha, qurylysy aıaqtalmaǵan bul úılerde úleskerlerdiń qarajaty joq. Sapasyz turǵyn úıler jyl sońyna deıin súrilip, kelesi jyly ornyn abattandyrý jumystary bastalady. Aıta keteıik, "Zerdeli" yqshamaýdanynda qısaıǵan 30 úıdiń 23-niń irgetasy kúsheıtilgen. Jyl sońyna deıin taǵy 7 úı nyǵaıtylady.
«Instıtýttyń qorytyndysy boıynsha úıdiń sapasy óte nashar. Atap aıtqanda, armatýrasy sáıkes kelmeıdi. Úı qısaıyp durys salynbaǵan. Jergilikti búdjetten berildi. Eki úıdi buzýǵa. Óıtkeni terıtorıasy óte kishkentaı, kórdińizder. Úlken tehnıkalar kire almaıdy. Jumysy óte kóp adam kúshimen jasalynatyn jumys. Toǵyz qabatty úıdi buzý úshin úlken jumys kerek oǵan», - dedi Almaty qalalyq qurylys basqarmasy basshysynyń orynbasary Aıdar Nurǵojaev.