Ortalyq komýnıkasıalar qyzmetinde ótken baspasóz konferensıasynda İshki ister mınıstri Marat Ahmetjanov memlekettik tilge qatysty saýal joldaǵan jýrnalısiń suraǵyna jaýap berdi, dep habarlaıdy Almaty-akshamy.kz Baq.kz-ke silteme jasap.
BAQ ókili İshki ister mınıstrliginde memlekettik tildiń qoldanylý aıasy tar ekenin alǵa tartyp, qazaq tili nelikten aýdarma tili retinde qoldanylyp júrgenin surady.
Mınıstr jýrnalıs saýalǵa tıek etken aýdarma til jónindegi aqparatty rastaı almaıtynyn aıtyp, jınalystardyń qazaq tilinde júrgiziletinin atady.
- Bizdiń shuǵyl májilisimiz bolsyn, alqa májilisi bolsyn memlekettik tilde ótedi. Suraq kelgende, bergen tilde jaýap berýge mindettimiz. Ol jerde basqa tilge basymdyq berý nemese memlekettik tildi shettetý faktileri joq dep esepteımin, - dedi mınıstr.
Keıinnen mınıstrden İshki ister mınıstrliginde is-qaǵazdar memlekettik tilde júrgizilýi úshin jáne mınıstrlik mamandary qazaq tilin jaqsy meńgerýi úshin qandaı ister atqarylyp jatqany suraldy.
- Sizdiń qoıǵan suraqtaryńyzdyń jany bar shyǵar. Biz de ony eskeremiz. Biraq meniń oıym - eshqandaı tapsyrma qajet emes. Suranys bolǵan kezde, sol tilde sóılep, sol tilde jaýap beredi, - dep jaýap berdi mınıstr.
Sondaı-aq ol memlekettik tildi bilý ár qyzmetkerdiń mindeti ekenin aıtyp, ondaı kemshilikter bolsa, shara qoldanylatynyn jetkizdi.