1-18 shilde aralyǵynda Qazaqstan Respýblıkasynyń aýmaǵynda İİM jedel qyzmetteri 97 qylmyskerdi ustady, onyń 28-i shet memleketterdiń suraýy boıynsha.
Sonymen qatar habar-osharsyz ketken 115 adamnyń ornalasqan jeri anyqtaldy, dep habarlaıdy almaty-akshamy.kz Polisia.kz-ke silteme jasap.
Almatyda izdeýde júrgen ózbekstandyq azamat ustaldy. Er adam kórshi memlekettiń veterınarıa jáne mal sharýashylyǵyn damytý komıteti bólgen 400 mln teńgeden astam sýbsıdıany jymqyrdy dep kúdikke ilingen. Mańǵystaý polıseıleri Jańaózen turǵynyna dene jaraqatyn keltirgen buzaqyny ustady. Ustalǵandardyń barlyǵy ýaqytsha ustaý ızolátorlaryna qamaldy. Aıta ketý kerek, qylmyskerlerdi izdestirý tek Qazaqstan Respýblıkasynyń aýmaǵynda ǵana emes, sonymen qatar halyqaralyq kelisimder negizinde shet elderde de júzege asyrylyp, onda izdestirý toptary jiberiledi.
Máskeý oblysynyń Hımkı qalasynda reseılik áriptestermen birlesip jedel-izdestirý is-sharalaryn ótkizý kezinde qazaqstandyq azamattar quryqtaldy. Olar ótken jyldyń qańtar aıynda Shymkentte jergilikti turǵyndardy uryp-soqqan. Jábirlenýshilerdiń biri alǵan jaraqattarynan kóz jumǵan. Atalmysh is boıynsha barlyq kúdiktiler ustaldy. Sankt-Peterbýrg qalasynda 36 jastaǵy er adam quryqtaldy. Ol 2019 jyly semeılik turǵyndy aldap, quny 50 mln teńge bolatyn búldozerdi ıemdengen. Qazaqstan Respýblıkasy men Reseı Federasıasynyń quzyrly organdary ustalǵandardy ekstradısıalaý týraly máseleni qarastyryp jatyr.