Júrekti syzdatqan qańtar oqıǵasyna da jyl tolyp qaldy. Jurtshylyqtyń janyn júdetken qaraly kúnderdiń qalyń tumany áli de tolyq seı̆ile qoı̆ǵan joq, árıne. Sanaǵa túsken aýyr sal maqty jeńildetý jolynda el bolyp, qoǵam bolyp atqaratyn jumystar áli de az emes...
Búgingi Qazaqstan Respýblıkasynyń Prezıdenti kelip ashqan Almaty qalasyndaǵy «Taǵzym memorıaly» osy arnadaǵy ıgilikti istiń bir parasy ispettes.
Bir jaǵynan qaraǵanda tym qarapaı̆ym, ekinshi jaǵynan asa kúrdeli bolyp kórinetin kompozısıalyq keshenniń, bizdiń oı̆ymyzsha, eki úlken mazmundyq arnasy bar sıaqty.
Birinshiden, bul – keshegi teńdik surap, áleýmettik ádilet izdep alańǵa shyqqan, sol jolda arandatýshylardyń sýyq qolynan qaza bolǵan bozdaqtardyń rýhyna taǵzym.
Ekinshiden, bul – halyqtyń berekesin qashyryp, jurttyń ishine alaýyzdyq týǵyzǵan, áleýmettik kıkiljińdi qandy qasiretke deı̆in jetkizgen tótenshe joı̆qyn oqıǵadan alatyn taǵylym.
Memorıaldyń avtorlary osy eki ıdeıany astastyra tutastyryp, tálim-tárbıelik ustyny berik, halqymyzdyń dástúrli dúnıetanymy men búgingi zamanaýı maqsat-muratymen ushtastyratyn tamasha astarly máni bar kompozısıa qurastyra bilgen.
Máselen, eskertkish-taqtalardyń tabanyndaǵy sý beı̆nesi – ómirdiń, máńgiliktiń sımvoly. Al aq, qara tústes mármár tastardyń qatarlasyp, almasyp kelip otyrýy – qaı̆ǵy men qýanyshtyń, jaqsylyq pen jamandyqtyń, eski men jańanyń qabattasyp kelip otyratyn tirshilik zańdylyǵyn bildirse kerek. Memorıaldaǵy aq tastardyń asqaq, bıik jáne qara tastarǵa qaraǵanda áldeqaı̆da kóptigi – elimizdiń rýhynyń bıiktigin, bolashaqqa umtylǵan arman-muratynyń kirshiksiz tazalyǵyn, erteńiniń ashyq-jarqyn ekendigin beı̆nelep turǵandaı̆.
Dál sol aq taqtalarǵa jazylǵan uly babalarymyzdyń asyl sózderi tarıhtyń tereń taǵylymyna boı̆latady. Ol jazbalar jas urpaqqa:
«Bereke men birlik – sabyr men tózim arqyly baıandy!»,
«Qazaqtyń máńgiligi – yntymaǵy
men tutastyǵynda».
«Bir kúndik áreket myń kúndik berekeni tas-talqan etetindigin esterińnen shyǵarmańdar!»
dep ósıet aı̆typ turǵandaı̆.
Búgin ǵana ashylǵan «Taǵzym memorıaly» táýelsizdik jyldaryndaǵy talaı̆ dúbirli oqıǵalardyń kýási bolǵan Almaty ortalyǵyndaǵy tarıhı alańmen tabıǵı úı̆lesip, keleshekke ǵıbrat aı̆typ turatyn qasterli orynǵa aı̆nalady dep senemiz!