Hokeıden (3×3) Ulttyq qurama Kanvon Olımpıadasynyń qola medalin jeńip aldy.
Júlde jolyndaǵy machta bizdiń órender Aýstrıa quramasynan basym tústi. Esep: 6:5 (4:1, 1:2, 1:2), dep habarlaıdy Almaty-akshamy.kz Týrızm jáne sport mınıstrligine silteme jasap.
Osy tusta Qazaqstan men Aýstrıa birneshe kún buryn toptyq kezeńde oınap, asa tartysty kezdesý 8:9 esebimen Eýropadan kelgen komandanyń paıdasyna aıaqtalǵanyn aıta keteıik.
Kanvondaǵy IV qysqy jasóspirimder Olımpıadasyna kelgen Ulttyq qurama: Temirlan Aıboluly, Beksultan Maqysh, Arsenıı Kýchkovskıı, Ádilhan Sattar, Nıkıta Kýlakov, Matveı Reshetko, Rasýl Tursynov, Arman Tólen, Jahangır Tileýhan, Taır Bıgarınov, Egor Kravchenko, Roman Mıchýrov, Ánýar Ahmetjanov.
Básekeniń bas júldesi úshin birazdan soń Latvıa men Danıa hokeıshileri kúsh synasady. Jalpy 3×3 hokeı oıyndar baǵdarlamasyna alǵash ret qosylyp otyr.
Bul Qazaqstan delegasıasynyń qorjynyna túsken 3-medal. Osyǵan deıin Kanvondoda shańǵymen tuǵyrdan sekirýde Ilá Mızernyh altynnan alqa taqsa, short-trekshi Polına Omelchýk 1000 metrge jarysta úzdik úshtikti túıindedi.
Qazir Qazaqstan jalpy esepte 1 altyn, 2 qola medalmen 14-satyǵa kóterildi.
Azıa qurlyǵynda alǵash ret ótip jatqan keshendi jarys qazirdiń ózinde Qazaqstan úshin tarıhı nátıjemen este qaldy. Osyǵan deıingi oıyndarda otandastarymyz chempıon atanbaǵan edi. Jasóspirimder Olımpıadasy 2 aqpanda máresine jetedi.