Ózbekstannyń Hıýa qalasyna ıslam áleminiń týrısik shahary mártebesi berildi.
Muny aıǵaqtaıtyn arnaıy sertıfıkatty Islam yntymaqtastyǵy uıymynyń basshylyǵy tabys etti, dep habarlaıdy Almaty-akshamy.kz.
Eki jyl buryn uıymǵa múshe elderdiń sesıasynda Hıýa, Ábý-Dabı, Shanlyýrfa, Lagos pen Dýshanbe «2024 jylǵy ıslam áleminiń týrısik shahary» mártebesine usynylǵan. Orta Azıadaǵy bes qalanyń ishinen Hıýa laıyq dep tanyldy.
2500 jyldyq tarıhy bar Hıýa qalasyndaǵy erekshe sharaǵa Islam yntymaqtastyǵy uıymynyń ókilderi, sarapshylar men týrızm salasyna jaýapty azamattar kelgen. Tarıhı shaharǵa ıslam áleminiń týrısik astanasy mártebesiniń berilýi Hıýanyń saıahatshylar úshin asa tanymal baǵytqa aınalýyna múmkindik beredi.
«Bul shahar ejelden mádenıettiń, ǵylym men órkenıettiń ortalyǵy retinde tanylǵan. Astronomıa, matematıka, hımıa ilimderi boıynsha kóptegen oqý oryndary men iri ǵylymı ortalyq dál osy qalada boldy. Hıýa óziniń baı tarıhymen, ári biregeı sáýletimen ortaq muramyzdyń mańyzyn aıshyqtap keledi», - deıdi Islam yntymaqtastyǵy uıymy Bas hatshysynyń orynbasary Ahmad Kavesa Sengendo.
Byltyr Hıýaǵa 500 myńnan astam týrıs kelgen. Aldaǵy ýaqytta saıahatshylar sanyn 1 mlnǵa deıin jetkizý úshin qajetti jaǵdaı jasalyp jatyr. Ataqty Hıýa qalasy Ortalyq Azıada birneshe myń jyldyq tarıhtyń syryn qoınaýyna búkken jáne tolyq saqtalǵan jalǵyz shahar. 1990 jyly IýNESKO-nyń sheshimimen «Dúnıejúzilik mura nysandary» tizimine endi.
«Saıahatshylarǵa jaǵdaı jasaýdy barynsha jaqsatrtý basty nazarda. Týrızm salasynda qyzmet kórsetetin azamattardy shetelde oqytý jolǵa qoıylǵan. Munan ózge Hıýanyń tarıhyn kópshilikke keńinen nasıhattaýǵa den qoıyp kelemiz. Zıarat týrızmi baǵytynda festıvál ótkizýdi josparlap otyrmyz», - týrızmdi damytý komıtetiniń basqarma basshysy Ibrohım Barnoev.
Shara barysynda Hıýa qalasynyń hokımatyna «2024 jylǵy ıslam áleminiń týrısik astanasy» mártebesiniń sertıfıkaty tabystaldy. Bıyl mamyr aıynda IYU-ǵa múshe elderdiń sesıasy ótpek. Onda «Horezm handarynyń taǵamdary» atty gastronomıalyq festıvál, foto jáne kórkem týyndylar kórmesin ótkizý jospary bar.