Talǵar aýdandyq sotynda tórt jyl buryn sportshyny urlaý jáne soqqyǵa jyǵý isine kúdikti retinde tanylǵan Hasan Qasymbaevqa qatysty qylmystyq is qarala bastady, dep habarlaıdy aqshamnews.kz
Hasan Qasymbaevtyń esimi elge 2024 jylǵy 4 qazanǵa qaraǵan túni Talǵarda "Qamajaı" dúkeniniń mańynda bolǵan qaqtyǵysqa ulasqan janjaldan keıin belgili boldy. Daýly oqıǵa 16 jastaǵy Sherzat Polattyń ólimimen aıaqtalǵan edi. Qoǵamda bul qylmysqa kináliler "Hýtorskıe" degen uıymdasqan toptyń músheleri ekeni, al uıymnyń basshysy Qasymbaev ekendigi jaıly alyp-qashpa sóz taraǵan bolatyn. Turǵyndardyń aıtýynsha, bul top aımaqty úreıde ustaǵan, soqqyǵa jyǵý men qoqan-loqy jasaý derekteri de bolǵan. Alaıda İshki ister mınıstrligi mundaı toptyń bar ekenin joqqa shyǵardy, degenmen Qasymbaev qamaýǵa alyndy.
Sotqa deıin tergeý múddesi úshin istiń barysy týraly aqparat jarıalanbaǵan.
Sot prosesine jábirlenýshiler men aıyptalýshylardyń týystary qatysýda, oqıǵa ornynda jedel qyzmetter kezekshilik atqarýda.
İs qazaq tilinde, sýdıa Aınagúl Tuqabaevanyń tóraǵalyǵymen ashyq rejımde ótýde.
Aıta ketsek, Hasan Qasymbaevqa birden úsh bap boıynsha aıyp taǵyldy: adam urlaý, qasaqana aýyr dene jaraqatyn keltirý jáne qorqytý. Ol 2024 jylǵy 2 qarashada ustalǵan.
Onymen birge taǵy bes adam aıyptalýshylar oryndyǵynda otyr.
Jábirlenýshiler qatarynda eki adam, ázirge olardyń jeke derekteri jarıa etilmegen.
Aıta ketsek, Talǵarda "Hýtorskıe" degen uıymdasqan qylmystyq toptyń basshysy retinde tanylǵan Hasan Qasymbaevtyń ustalǵany 2024 jylǵy 4 qarashada belgili boldy. Keıin Almaty oblysy PD ol ýaqytsha ustaý ızolátoryna "qasaqana aýyr dene jaraqatyn keltirýge jáne MMA sportshysy Arman Álimulyn urlaýǵa qatysy bar" degen kúdikpen qamalǵanyn naqtylady. Tamyz aıynyń basynda tergeý aıaqtaldy.