Elimizde turmystyq zorlyq-zombylyqqa qarsy kúres jazasy qataıyp keledi.
Astanada Ortalyq Azıa elderi áıelder dıalogynyń halyqaralyq konferensıasy ótip jatyr, dep habarlaıdy Almaty-akshamy.kz
«Óńirdegi genderlik zorlyq-zombylyqqa qarsy kúres: tıimdi jáne turaqty birlesken sheshimderdi izdeý» taqyrybyndaǵy jıyn BUU qoldaýymen uıymdastyrylǵan.
Bıyl Qazaqstan 2023 jylǵy Ortalyq Azıa áıelderi dıalogyna tóraǵalyǵy aıaqtalady.
Jıynǵa Qazaqstan men Ózbekstan parlamenti palatalarynyń spıkerleri, Qazaqstan prezıdenti janyndaǵy Áıelder jáne otbasylyq-demografıalyq saıasat jónindegi ulttyq komısıanyń músheleri, Qyrǵyzstan, Tájikstan jáne Túrikmenstan parlamentshileri, memlekettik organdardyń basshylary, sondaı-aq úkimettik emes jáne halyqaralyq uıymdardyń, dıplomatıalyq korpýstyń ókilderi qatysyp otyr. Qatysýshylar Ortalyq Azıa óńirindegi genderlik zorlyq-zombylyqpen kúresýdegi jáne áıelder quqyqtaryn qorǵaýdaǵy Parlamentter men azamattyq qoǵamnyń rólin talqylaıdy, sondaı-aq genderlik quqyq salasyndaǵy qoldanystaǵy zańnama men quqyq qoldaný tájirıbesin jetildirýge qatysty zamanaýı syn-qaterler men ózekti máselelerdi qarastyrady.
Jıynda sóz sóılegen Erlan Qoshanov óńirdegi genderlik teńdik máselelerin kóterip júrgen Birikken Ulttar Uıymynyń, saraptamalyq qoǵamdastyq pen azamattyq sektor ókilderine arnaıy rızashylyq bildirdi. Baıandamasynda Qazaqstanda zorlyq-zombylyqqa qarsy zańnamalyq turǵyda qandaı jumystar atqarylyp jatqanyn aıtyp berdi.
«Qazaqstanda keıingi jyldary otbasylyq-turmystyq zorlyq-zombylyqqa qarsy kúres aıasynda jazalar únemi qataıyp keledi. Búgin biz, zań shyǵarýshylar jumysty odan ary jalǵastyryp jatyrmyz. Depýtattar osy saladaǵy zańnamalyq novelalardyń jańa paketin ázirleýge kiristi. Birinshiden, biz turmystyq zorlyq-zombylyq úshin jaýapkershilikti qylmystyq jaýapkershilikke tartýdy josparlap otyrmyz. Densaýlyqqa ortasha jáne aýyr zıan keltirgeni úshin, qabyldanǵan jaǵdaıda, tek bas bostandyǵynan aıyrý kózdeletin bolady. Bostandyqty shekteý sıaqty jazanyń bul túri tolyǵymen alynyp tastalady», - deıdi Qoshanov.
Onyń sózinshe, «harassment» degen túsinikti engizý kózdelgen.
«Depýtattar bul taqyrypty ózderiniń depýtattyq saýaldarynda belsendi túrde kóterip keledi. Sonymen qatar, qazir áıelder "stalkıng" sıaqty qubylyspen, ıaǵnı qýdalaýǵa jıi ushyraıdy. Mundaı áreketter úshin kóp elde qylmystyq jaýapkershilik engizildi. Bizdiń elderimizge de osyndaı áreketter úshin jazany qatańdatý týraly oılanatyn kez keldi», - deıdi Qoshanov.