Qazaqstan Respýblıkasy Tótenshe jaǵdaılar mınıstrligi Qazaqstan Respýblıkasynyń aýmaǵyndaǵy kezekshilik-dıspecherlik qyzmetterdiń qyzmetin úılestirý qaǵıdalaryn jáne aýmaǵynda biryńǵaı kezekshi-dıspecherlik «112» qyzmetiniń ókilettigin bekitip, ádilet organdarynda tirkedi.
Bul qujat azamattyq qorǵaý júıesiniń tıimdiligin arttyrýǵa jáne halyqtyń qaýipsizdigin qamtamasyz etýge baǵyttalǵan, - dep habarlaıdy Aqshamnews.kz.
Jańa redaksıa Qazaqstan Respýblıkasy Úkimetiniń 2020 jylǵy 23 qazandaǵy №701 qaýlysymen bekitilgen Tótenshe jaǵdaılar mınıstrligi týraly erejeniń 16-tarmaǵynyń 69) tarmaqshasyna sáıkes ázirlendi.
Qujat BKDQ basqarmalaryn, İİM polısıa kezekshi bólimshelerin, jedel medısınalyq járdem men sanıtarlyq avıasıanyń dıspecherlik qyzmetterdi, Ulttyq qaýipsizdik komıtetiniń qyzmetteri, áýe kemelerin izdestirý jáne qutqarý ortalyǵyn, komýnaldyq apattyq qyzmetter men baılanys operatorlarynyń anyqtama qyzmetterin qosa alǵanda biryńǵaı kezekshilik jáne jedel qyzmetterdiń ózara is-qımyl tártibin belgileıdi.
Barlyq atalǵan qurylymdar tótenshe jaǵdaılarǵa, azamattardyń ómiri men densaýlyǵyna tónetin qaterlerge jedel den qoıý maqsatynda tyǵyz úılesimdilikpen jumys isteıdi. Bul aqparattyń jedel jetkizilýin, is-qımyldardyń kelisimdiligin jáne qajetti resýrstardyń 112 biryńǵaı nómiri arqyly baǵyttalýyn qamtamasyz etedi.
Tótenshe jaǵdaılar týyndaǵan kezde BKDQ basqarmalary ózara is-qımyl jasaıtyn barlyq qyzmetterdiń áreketterin úılestiredi. Osy maqsatta olar múddeli memlekettik organdardyń aqparattyq júıelerimen ıntegrasıalanǵan jáne óńirlerdegi qoldanystaǵy baılanys ınfraqurylymyn paıdalanady.
Ózara is-qımyl úsh negizgi rejımde uıymdastyrylǵan: kúndelikti qyzmet – daıyndyqty qamtamasyz etý jáne aqparat almasý; joǵary ázirlik rejımi – kúsheıtilgen monıtorıń pen resýrstardy ázirleý; tótenshe jaǵdaı rejımi – jedel den qoıý, basqarý jáne qajetti kúshter men quraldardy jiberý.
Engizilgen ózgerister Qazaqstan Respýblıkasynyń barlyq aýmaǵynda jedel den qoıý júıesiniń tıimdiligin jáne halyqtyń qaýipsizdigin arttyrýǵa baǵyttalǵan.