Táýelsizdik – ata-babamyzdyń asyl armany, ulttyń uly muraty. Osy qasıetti kúndi ulyqtaý maqsatynda №110 mektep-gımnazıasynda «Táýelsizdik jalyny – júregimizde»atty rýhanı-patrıottyq baǵyttaǵy merekelik is-shara ótti. Bul tek merekelik kesh qana emes, bul – ult namysy úshin basyn báıgege tikken erlerge taǵzym, azattyqty arman etken jastarǵa ishteı eskertkish ornatý boldy. İs-shara barysynda oqýshylar eń aldymen 1986 jylǵy Jeltoqsan oqıǵasynyń kýágerlerimen júzdesti.«Aıbyn» ordeniniń ıegeri, Qazaqstan Respýblıkasynyń Bilim salasynyń Qurmetti qyzmetkeri,ardager, Patrıottyq qozǵalys «Jeltoqsan Aqıqaty» Respýblıkalyq qoǵamdyq birlestiginiń Jetisý aýdandyq fılıalynyń jetekshisi Smagýlov Týken Jýmabekuly men Uıym múshesi,ardager Qasqabasov Qasym Alseıtuly sol bir zulmat kúnderdiń shyndyǵyna tereń boılap, ar men namys úshin alańǵa shyqqan bozdaqtardyń kóz jasyn, jan aıqaıyn júrekke jetkize áńgimelep berdi.Sondaı-aq mektebimizdiń aǵa oqytýshylary, «Jeltoqsan oqıǵasynyń» qatysýshylary Salımova Kúlásh Sabenovna men Sarsenbına Láılá Sagmanovnanyń áńgimesinen alańdaǵy muzǵa tońyp, namystan janǵan jastardyń kúresi – búgingi urpaq úshin uly sabaq ekenin túsindi. Kezdesý kezinde olar tarıhı sátterge sholý jasap, el táýelsizdigi jolyndaǵy kúres pen sol kúnderdiń aýyr da, abyroıly júgin baıandady. Oqýshylar jeltoqsanshylardyń batyrlyǵy men qaısarlyǵyna tánti bolyp, kókeıdegi suraqtaryn qoıyp, ashyq-jarqyn suhbat qurdy.
Mereke barysynda oqýshylar jeltoqsan kóterilisin kórinis arqyly sahnalap, sol bir syndarly sátterdi shynaıy beınelep kórsetti. Sol kezeńdegi jastardyń erik-jigerin, ádiletsizdikke qarsy turǵan tabandylyǵyn, ultqa degen mahabbatyn tebirenispen jetkizdi Bul kórinis oqýshylardyń júregine jol tartyp, patrıottyq sezimin oıatty. Sonymen qatar, shara aıasynda «Arǵymaq» toby patrıottyq ánderin oryndap, kórermenderdi baýrap aldy. Jas ónerpazdar «Meniń Qazaqstanym», «Jeltoqsan jeli», «Rýh» syndy ánderdi shyrqady. İs-shara barysynda táýelsiz elimizdiń búgingi jetistikteri men urpaq aldyndaǵy jaýapkershiligi týraly oılar aıtylyp, táýelsizdik – máńgilik qundylyq ekeni tereń nasıhattaldy.
Merekelik kesh sońynda mektep dırektory Rýfınat Bekdaıyrqyzy qonaqtar men uıymdastyrýshylarǵa alǵys bildirip,quttyqtaý joldady.Kesh qonaqtary da batasyn berip, el bolashaǵy – jas urpaqtyń boıyndaǵy rýh pen jiger ekendigin jetkizdi.
Sonymen qatar mektebimizdiń jas sýretshileri «Sýret kórmesin» uıymdastyryp,táýelsizdigimizdiń nyshany bolǵan ulttyq rámizderimizdi beıneledi.Sport zalda dene shynyqtyrý páni muǵalimderiniń bastamasymen «Ulttyq oıyndar» atty ata-analardyń qatysýymen saıys ótti.Kitaphanamyzda «Táýelsizdik-el tiregi» taqyrybynda mánerlep oqý jarysy, al bastaýysh synyptarda patrıottyq baǵyttaǵy ashyq sabaqtar ótkizildi. Este qalarlyqtaı ádemi sátter men salıqaly suqbattardy «AlmaTV» telearnasy qyzmetkerleri beınetaspaǵa túsirip, kógildir ekran arqyly kópshiliktiń nazaryna usyndy.
Osyndaı taǵylymy mol, rýhty kóteretin kezdesýler men merekelik sharalar jas urpaqtyń boıyna Otanǵa degen súıispenshilikti sińirýde úlken ról atqarady. Sebebi, Táýelsizdik jalyny – ár qazaqtyń júreginde!