S.J. Asfendıarov atyndaǵy Qazaq ulttyq medısına ýnıversıtetinde ótken kezdesýde QazUMÝ rektory Marat Shoranov Dımash Qudaıbergenge mádenıetti damytýǵa, jastardyń rýhanı tárbıesine qosqan úlesi jáne Qazaqstannyń halyqaralyq ımıjin ilgeriletýdegi eńbegi úshin QazUMÝ-dyń Qurmetti profesory ataǵyn tabystady, dep habarlaıdy aqshamnews.kz
Motıvasıalyq kezdesýde Dımash Qudaıbergen óziniń ómirlik jáne shyǵarmashylyq joly týraly oı bólisti. Ol ulttyq mádenıetpen baılanysyn úzbeı, týǵan tamyryn saqtaı otyryp, álemdik sahnalarǵa qalaı jetkenin baıandady. Óner ıesi adamnyń jeke bolmysyna qatysty qundylyqtarǵa erekshe toqtaldy:
«Men adamdy eń aldymen rýhanı baılyǵymen baǵalaımyn. Talant pen kásibı qabilet odan keıingi nárse. Eger ishki negiz bolmasa, qandaı jetistikke jetseń de, onyń salmaǵy sezilmeıdi», – dedi Dımash.
QazUMÝ stýdentterine arnaǵan sózinde Dımash Qudaıbergen medısına mamandyǵynyń kúrdeliligi men jaýapkershiligin atap ótti:
«Sizder óte qıyn ári jaýapty joldy tańdadyńyzdar. Medısına – qatelikti keshirmeıtin sala. Bul úzdiksiz izdenisti, óz-ózińe talap qoıa bilýdi qajet etedi. Menińshe, naǵyz juldyzdar - dárigerler. Olar kún saıyn adam ómirin saqtap qalady», – dedi Dımash.
Sondaı-aq óner ıesi stýdentterge aldaǵy emtıhan sesıasyn sátti tapsyrýǵa tilektestigin bildirdi.
Kezdesýdiń eń áserli sátteriniń biri - Dımash Qudaıbergenniń QazUMÝ stýdentterinen quralǵan «Dala sazy» ulttyq aspaptar ansamblimen birlesip óner kórsetýi boldy. Ortaq oryndaýda «Adaı» kúıi shyrqalyp, sahna men kórermen zalyn bir arnaǵa toǵystyrdy.