Almaty qalasynyń bilim berý júıesin damytýdaǵy 2023-2030 jyldarǵa arnalǵan óńirlik jol kartasy negizinde Almaty elektromehanıka kolejiniń energetıka salasynda sheberhana meńgerýshisi retinde 2023 jyldyń kúz aıynda Brazılıa memleketinde elektr-energetıka salasy boıynsha halyqaralyq taǵylymdamadan ótip keldim. Bul taǵylymdama maǵan álemdik deńgeıdegi jańa tehnologıalardy meńgerýge, aldyńǵy qatarly óndiristik tájirıbeni zertteýge jáne zamanaýı ádisterdi oqý prosesine engizýge zor múmkindik berdi.
Halyqaralyq tájirıbe men ózimniń kásibı jumysymda jınaqtaǵan bilimimdi saralaı otyryp, bilim alýshylarymyzǵa qazirgi zamanǵa saı tehnologıalardy jáne baǵdarlamalardy biriktirip, SMART PRODUCTIONS (Aqyldy ónerkásip) jobasy aıasynda bilim berýdi maqsat tuttym. Bul joba – ónerkásip pen zaýyttardy zamanaýı qurylǵylarmen jáne baǵdarlamalar arqyly basqarýdyń ınovasıalyq tásili. Jalpy, SMART PRODUCTIONS júıesi úsh negizgi baǵytta jumys isteıdi: óndiristi iske qosý, basqarý jáne retteý; óndiris barysyn baqylaý; aqaýlardy anyqtap, jóndeý jumystaryn júrgizý.
Taǵylymdama barysynda álemniń aldyńǵy qatarly zaýyttary men kásiporyndarynda qoldanylatyn tehnologıalardy zerttep, olardyń tıimdiligin kózben kórdim. Búgin de óndiris oryndary tolyq avtomattandyrylǵan júıelerge kóship, óndiristik prosesterdi sandyq formatta basqarý múmkindigine ıe. Bul ózgerister Qazaqstannyń tehnıkalyq jáne kásiptik bilim berý júıesinde de óz ornyn tabýy tıis dep esepteımin.
Men qazirgi tańda SMART PRODUCTIONS júıesi negizinde bilim berý arqyly stýdentterimizge zamanaýı óndiristiń talaptaryna saı daǵdylardy meńgertýdi kózdep otyrmyn. Jobamnyń basty maqsaty – óndiristegi avtomattandyrylǵan basqarý júıelerin, smart-tehnologıalardy jáne jasandy ıntellekt múmkindikterin qoldanyp, kásibı bilikti mamandar daıarlaý.
Osy taqyrypty oqý baǵdarlamasyna engizip, stýdentter men óndiristik oqytý sheberlerine arnaıy kýrstar men tájirıbelik sabaqtar uıymdastyryp SMART PRODUCTIONS júıesiniń negizderin jan-jaqty túsindirip úıretýdemin. Osylaısha, zamanaýı tehnologıalardy meńgergen mamandardy daıarlaý isi qarqyndy júzege asyrylýda. Osy jumysymyz el Prezıdenti Q.J.Toqaevtyń «2025-Jumysshy mamandyqtar jyly» baǵdarlamasyna tuspa-tus kelýiniń ózi SMART PRODUCTIONS jobasy aıasynda kásibı bilim berý júıesinde jańa múmkindikter ashyp, stýdentterge zamanaýı óndiristik standarttarǵa saı daǵdylardy úıretýge zor yqpal etýde.
Osy salanyń mamany retinde bolashaqta oqý ornymyzdaǵy zerthanalar men óndiristik alańdardy jańǵyrtý, ınovasıalyq jobalardy júzege asyrý, sondaı-aq stýdentterdiń tájirıbelik bilimin shyńdaý baǵytynda qarqyndy jumys júrgizlip, elimizdiń ónerkásibine jańashyl, básekege qabiletti mamandar daıarlaýda Almaty elektromehanıka koleji aldyńǵy qatardan kórinetinine senimdimin!
Náljigit Beknur Muratuly
“Almaty elektromehanıka koleji” KMQK,
sheberhana meńgerýshisi