Almaty qalasynyń bilim berý júıesin damytýǵa arnalǵan 2023–2030 jyldarǵa arnalǵan óńirlik jol kartasy aıasynda 2024 jyldyń 3–24 qarashasy aralyǵynda áriptesim, avtokólikke qyzmet kórsetý sheberhanasynyń meńgerýshisi Ǵabıt Sovetjanulymen birge Ońtústik Koreıaǵa issaparmen bardyq. Saparymyzdyń negizgi maqsaty – Koreıanyń zamanaýı avtokólik tehnologıalarymen, atap aıtqanda gıbrıd jáne elektromobılderdiń qurylymy men jóndeý ádisterimen tanysý, tájirıbe almasý boldy.
İssapar barysynda biz KOOKGE Institute of Technology oqý ornynda taǵylymdamadan óttik. Munda zamanaýı avtokólik óndirisindegi jańa tehnologıalardy zerttep, ınovasıalyq jabdyqtarmen jumys isteý daǵdylarymyzdy jetildirdik. Sonymen qatar, Koreıanyń jetekshi avtoóndirýshi kompanıalarymen baılanys ornatyp, olardyń zerthanalarynda tájirıbe júrgizý múmkindigine ıe boldyq. Bul sapar bizge Koreıa avtomobıl ındýstrıasyndaǵy sońǵy trendter men damý baǵyttary týraly qundy aqparattar jınaýǵa jol ashty.
Salystyra qaraǵanda, Koreıa avtoóndiriste avtomattandyrylǵan júıeler men ozyq tehnologıalardy keńinen qoldanady. Qazaqstanda bul sala endi ǵana qarqyn alyp keledi. Degenmen, elimizde de elektrli jáne gıbrıdti kólikter óndirisine betburys jasalyp, jańa zaýyttar ashylyp jatyr.
Taǵylymdama barysynda jınaǵan bilimim men tájirıbemdi Almaty elektromehanıka kolejindegi áriptesterimmen bólisip, stýdentterge zamanaýı tehnologıalardy úıretý arqyly oqý úderisin jańa deńgeıge kóterýge nıettimin. Elektromobılder men gıbrıd kólikterge qatysty bilimdi jetildirý – bolashaq mamandardyń básekege qabilettiligin arttyrýda mańyzdy ról atqarady.
Tehnıkalyq jáne kásiptik bilim berý uıymdarynyń oqytýshylarynyń halyqaralyq taǵylymdamadan ótýi – Qazaqstan Respýblıkasy Prezıdenti Qasym-Jomart Toqaevtyń 2025 jyldy «Jumysshy mamandyqtar jyly» dep jarıalaý bastamasymen úndesedi. Bul baǵdarlama elimizdegi tehnıkalyq bilim sapasyn arttyrýǵa baǵyttalǵan. Bizdiń mindet – stýdentterdi jańa tehnologıalarmen tanystyryp, olardyń kásibı áleýetin damytý.
Maemgenov Saýlet,
«Avtomobıl kólikterine tehnıkalyq qyzmet kórsetý, jóndeý jáne paıdalaný» mamandyǵy boıynsha Almaty elektromehanıka kolejiniń óndiristik oqytý sheberi