Kóktemgi áskerge shaqyrylǵan elý almatylyq Qaraǵandy oblysyndaǵy áýe shabýylyna qarsy qorǵanys áskerleriniń áskerı bóliminde qyzmet etetin bolady.
Jastardy áskerge qalalyq qorǵanys isteri jónindegi departamentiniń basshylyǵy, Qarýly kúshterdiń ardagerleri, týystary men jaqyndary shyǵaryp saldy, dep habarlaıdy aqshamnews.kz.
– Qyzmet barysynda óz boılaryńdaǵy tabandylyq, tózimdilik sıaqty mańyzdy qasıetterdi damyta alasyzdar. Áskerde tártipke úırenip, dene daıyndyǵy turǵysynan shyńdalyp shyǵasyzdar. Armıa ómirge beıimdelýge úıretedi, – dedi Almaty qalasy qorǵanys isteri jónindegi departamentiniń bastyǵy polkovnık Talǵat Ózehan.
Merzimdi áskerı qyzmetke jiberilmes buryn áskerge shaqyrylýshylar úsh kún boıy qorǵanys isteri jónindegi departamenttiń qalalyq jınaqtaý pýnktinde boldy. Olar medısınalyq komısıadan, psıhologıalyq testileýden ótti. Áskerı bólimderdiń ókilderimen áńgimelesti.
– Ulym Radıon áskerı qyzmetin óteýge esh oılanbastan keldi. Bul jerde alǵashqy kúnnen jyly shyraıly qarym-qatynasty sezindik. Kezdesýler men áńgimeldesýlediń bári túsinistik jaǵdaıynda ótti. Ulym úshin alańdaýǵa esh negiz joq, – dedi shaqyrylýshynyń anasy Irına Kısel.
Esterińizge sala keteıik, osy kóktemde áskerge 1500-den astam almatylyq shaqyrylady. Búgingi tańda 1000-nan astam jas merzimdi qyzmet ótkerý úshin áskerı bólimderge jiberildi.
Áskerge shaqyrylýshylar Qorǵanys mınıstrliginiń, Memlekettik kúzet qyzmetiniń, Ulttyq ulannyń, UQK Shekara qyzmetiniń jáne Tótenshe jaǵdaılar mınıstrliginiń áskerı bólimderinde qyzmet etetin bolady.