Álemde dopıngpen kúres barǵan saıyn kúsheıtilýde.
Osy máseleni qadaǵalaıtyn dúnıejúzilik agenttik sońǵy jyldary tyıym salǵan preparattardy qoldanǵan sportshylardy jazalaýdy qatańdata tústi, dep habarlaıdy Almaty-akshamy.kz.
Dopıngke qarsy dúnıejúzilik agenttik óziniń basty qujaty – dopıngpen kúres jónindegi Kodeksti 6 jylda bir ret talqylaıdy. Ádette uıymnyń kezekti basqosýynan keıin erejege ózgertýler engizilip, tártip qatańdatylady. Mysaly, 2015 jyly tyıym salynǵan zattardy alǵash ret qoldanǵan sportshyny jarystan shettetý merzimi 2 jyldan 4 jylǵa uzartyldy.
«2012 jylǵa deıin dopıngti qoldanǵan jeńil atlet sporttan 2 jyl ǵana shettetiletin edi. Qazir jaza – 4 jyl. Tártip buzý men qoldanylǵan preparat bir bolǵanymen, shekteý merzimi uzartylǵan», - deıdi sport jýrnalısi Vladımır Ivanov.
Al sportshy dopıngti ekinshi ret qoldansa, jarystardan 8 jylǵa alystatylady. Sarapshylar uzaq úzilisten keıin adamnyń úlken sportqa oralýy ekitalaı deıdi. Biraq mundaı jaǵdaılar joq emes.
«Mysal retinde 2006 jylǵy amerıkalyq jelaıaq Djastın Getlınmen bolǵan oqıǵany aıtýǵa bolady. Ol alǵash ret dopıng qoldanyp ustalǵan soń sportqa qaıta oraldy. Kóp uzamaı tyıym salǵan dárini taǵy qoldandy degen aıyppen sporttan ekinshi ret qýylady. Biraq atlet barlyq kináni jattyqtyrýshy men dárigerlerine jaýyp, jaza merzimin qysqartýǵa qol jetkizdi. Keıin úlken dodalarǵa qatysyp, Ýseın Bolttan ozyp álem chempıony atanady», - deıdi sport jýrnalısi Vladımır Ivanov.
Dúnıejúzilik dopıngke qarsy agenttik 2 jyl buryn jańa kodeks qabyldap, tártip taǵy qatańdatyldy. Biraq jeńil esirtkilerge qatysty tártip birshama jeńildetilgen. Atlet olardy jarystan tys kezderde qoldansa, sporttan baıaǵydaı birneshe jylǵa emes 3 aıǵa ǵana shettetilýi múmkin.
«Eger sportshy bul zattardy sporttyq maqsatta qoldanbaǵanyn dáleldese, shekteý sharalaryn 2-4 jyldan 3 aıǵa deıin azaıtýyna bolady. Al ońaltý baǵdarlamasyn ótýge kelisse, shekteý 1 aıǵa ǵana sozylady», - deıdi zańger Sergeı Lysenko.
Qalaı degenmen halyqaralyq sportta dopıngke jaza qatal. Tyıym salynǵan zattardy paıdalaný sońy úlken sportpen qosh aıtysýǵa ákelýi múmkin.