Almaty qalasy Qala qurylysyn baqylaý basqarmasynyń málimetinshe, Bostandyq aýdanyndaǵy tórt qabatty ákimshilik ǵımarat Eksperımentalnaıa kóshesiniń soltústigi men Hodjanov kóshesiniń shyǵysynda zańdy óreskel buza otyryp salynǵan. Nysan joba eskızinsiz salynǵan, sonymen qatar bekitilgen bas jospardan aýytqýlar tirkelgen, dep habarlaıdy Almaty-akshamy.kz.
Qala qurylysyn baqylaý basqarmasy jáne menshik ıesi arasyndaǵy sot prosesi eki jyldan astam ýaqyt boıy jalǵasyp keledi. Qysqasha sıpaty men tanystyryp ótemiz.
2020 jyldyń 6 naýryzynda talap aryz Bostandyq aýdandyq sotyna jiberildi. Sot uıǵarymymen talap aryz qanaǵattandyrylyp, Almaty qalalyq sotynyń 16.10.2020 jylǵy uıǵarymymen birinshi satydaǵy sot sheshimi ózgerissiz qaldyryldy.
2021 jyldyń 13 mamyrynda memlekettik sot oryndaýshysy menshik ıesine sot sheshimin erikti túrde oryndaý týraly habarlama jiberdi. Alaıda, bul ýaqytqa deıin menshik ıesi jer telimin basqa jeke tulǵaǵa satyp jibergen, osyǵan baılanysty sot oryndaýshysy qaýlyny oryndaýsyz qaıtarǵan.
Óz kezeginde, Qala qurylysyn baqylaý basqarmasy jer telimin satý shartyn jaramsyz dep taný týraly talap aryzǵa bastamashy boldy. 27.01.2022 jyly sot sheshimimen mámile jaramsyz dep tanyldy, Almaty qalalyq sotynyń 2022 jylǵy 27 sáýirdegi qaýlysymen sheshim ózgerissiz qaldyryldy.
Atqarý paraǵy Almaty qalasy Ádilet departamentine 2022 jyldyń 05 mamyrynda joldanǵan. Nysandy buzý 09.08.2022 jylǵa josparlanǵan bolatyn. Alaıda, sot oryndaýshysynyń áreketine shaǵymdanýyn eskere otyryp, buzý jumystary júrgizilmegen.
Odan ári jańadan ashylǵan mán-jaılarǵa baılanysty úshinshi tulǵa Almaty qalalyq sotyna buzý týraly sheshimge apelásıalyq shaǵym túsirdi. Almaty qalalyq sotynyń sheshimimen apelásıalyq shaǵym qanaǵattandyrýsyz qaldyryldy.
Búgingi kúni oryndaý Almaty qalasy Ádilet departamentiniń óndirisinde, sot oryndaýshysymen nysandy buzý merzimi áli belgilenbegen.