Baıqaý tórt kezeńnen turdy
Belarýs astanasy Mınskide TMD-ǵa múshe elderdiń joǵary oqý oryndary kýrsanttarynyń VII Halyqaralyq olımpıadasy aıasynda ásker tarıhynyń myqtylaryna arnalǵan zıatkerlik saıys aıaqtaldy, dep habarlaıdy Almaty-akshamy.kz.
Atalǵan shara Belarýs Respýblıkasynyń Áskerı akademıasynda ótti. Tarıh olımpıadasyna elimizdiń atynan Keńes Odaǵynyń eki márte Batyry Talǵat Bıgeldınov atyndaǵy Áýe qorǵanys kúshteri áskerı ınstıtýtynyń komandasy Amanjol Mahabbat, Dáýlet Ábdýálı, Danııl Kravchýk, Dosjan Ámirhan jáne Nursát Baımurat qatysty.
– Baıqaý tórt kezeńnen turdy. Birinshi jáne ekinshi kezeńde kýrsanttar Uly Otan soǵysynyń tarıhynan, oqıǵalar hronologıasynan, Stalıngrad túbindegi shaıqastan jáne basqa da bilimderin kórsetti. Úshinshi týr «áskerı-tarıhı saıys» túrinde ótse, al tórtinshisinde kapıtandardyń bilimi synaldy. Nátıjesinde kýrsanttar jalpy komandalyq úshinshi oryn enshiledi, – dedi top jetekshisi aǵa oqytýshy Batyr Sadaqov.
Jaýyngerlik tarıhtyń bilgirlerine arnaıy ekskýrsıalar men basqa da taqyryptyq sharalar uıymdastyryldy. Kýrsanttar Mınskiniń tarıhı oryndaryn aralady, sondaı-aq «Batyr – Brest qamaly» memorıaldyq keshenine de bardy.