Almaty qurylys-tehnıkalyq kolejinde Qazaqstan, Ózbekstan, Qyrǵyzstan, Tájikstan jáne Mońǵolıa kásiptik bilim berý mekemeleriniń pedagogteri arasynda 1Santehnıka jáne jylytý1 quzyrettiligi boıynsha halyqaralyq kásibı konkýrs ótti.
Kolej bazasynda GROHE resýrstyq ortalyǵy ashyldy.Atalǵan is-shara Memleket basshysy Qasym-Jomart Toqaevtyń Joldaýyn iske asyrý jáne Jumysshylar jylyn ótkizý aıasynda uıymdastyryldy.
Onyń basty maqsaty – jumysshy biliktiliginiń bedelin arttyrý, kásibı bilim berý júıesine qoǵamnyń nazaryn aýdarý, halyqaralyq deńgeıde pedagogterdiń tájirıbe almasýyna jaǵdaı jasaý. Konkýrsqa Almaty qalasy bilim basqarmasynyń ókilderi, «Talap» KEAQ, GROHE, KNAUF kompanıalarynyń mamandary, sondaı-aq Qazaqstan, Ózbekstan, Qyrǵyzstan, Tájikstan jáne Mońǵolıa memleketteriniń kásiptik bilim berý uıymdarynyń ókilderi qatysty.
GROHE resýrstyq ortalyǵynyń ashylýy santehnıka jáne jylytý salasyndaǵy bilim berýdi jańa deńgeıge kóterýge baǵyttalǵan. Ortalyqta zamanaýı jabdyqtar ornatylǵan, oqý barysynda qoldanylatyn ınovasıalyq tehnologıalar qarastyrylǵan. Bul jerde WorldSkills chempıonattaryna qatysýshylar daıyndalyp, kásibı sheberlik konkýrstary, sheberlik synyptary, biliktilikti arttyrý kýrstary uıymdastyrylady.
İs-shara aıasynda elimizdiń stýdentteri Euroskills Herning 2025 (Danıa) chempıonatyna irikteý týrynan ótti. Bul jarys – bolashaq kásibı mamandardyń biliktiligin kórsetetin mańyzdy alań. Jeńimpazdar halyqaralyq deńgeıde el namysyn qorǵaýǵa múmkindik alady.
Konkýrs tórt modýl boıynsha ótti. Olar: káriz qubyrlaryn jalǵaý, rakovına men qoljýǵyshtardy ornatý, barlyq júıeni biriktirý jáne býsh jabdyǵyn qosý jáne tolyq júıeni tekserý.
Konkýrsqa qatysýshylar óz sheberlikterin shyńdap, jańa tájirıbe jınaqtady. Baıqaý jumysshy mamandyqtarynyń mańyzdylyǵyn arttyryp, halyqaralyq yntymaqtastyqty nyǵaıtýǵa septigin tıgizedi.
Taqyrypqa oraı
Bekturǵan AHMETOV, Almaty qurylys-tehnıkalyq kolejiniń dırektory:
Tájirıbe almasý alańy
– Kolejimizde halyqaralyq deńgeıdegi aýqymdy is-shara uıymdastyryldy. GROHE resýrstyq ortalyǵynyń ashylýy da, «Santehnıka jáne jylytý» quzyrettiligi boıynsha halyqaralyq kásibı konkýrs ta – mańyzdy jobalar. Bul baıqaý bizge ne beredi? Birinshiden, kórshiles elderden kelgen muǵalimder men óndiristik oqytý sheberleri ózara tájirıbe almasyp, biliktiligin arttyrýǵa múmkindik alady. Ekinshiden, jumysshy mamandyqtarynyń bedelin kóterýge jáne olardyń qoǵamdaǵy mańyzyn nasıhattaýǵa yqpal etedi.Qazirgi kezde santehnık mamandyǵy joǵary tehnologıalyq, zamanaýı sala. Bizde túlekterimiz 700-800 myń teńgege deıin jalaqy alyp, turaqty jumys istep júr. Bul da osy mamandyqtyń suranysqa ıe ekenin kórsetedi.
Roman Basov, GROHE kompanıasynyń ókili:
Bir ǵasyr tájirıbesi
– Biz sizderdi osy mańyzdy oqıǵa – resýrstyq ortalyqtyń ashylýy men halyqaralyq kásibı jarystyń bastalýymen quttyqtaımyz. GROHE – sanıtarlyq-tehnıkalyq ónimder salasyndaǵy álemdik kóshbasshylardyń biri. Bizdiń tarıhymyz 1936 jyldan bastalady, jáne osy ýaqyt ishinde biz úlken tájirıbe jınaqtadyq. Bul tájirıbeni endi sizdermen bólisýge daıynbyz. GROHE kompanıasy kásibı bilim berýdi qoldaý maqsatynda álem boıynsha 75-ten astam oqý jobalaryn iske asyrdy, olardyń aıasynda 12 myńnan astam stýdent bilim aldy. Qazaqstanda biz eki resýrstyq ortalyqty iske qostyq: biri Astanada, ekinshisi Almatyda. Búginde osy ortalyqtardy damytýǵa erekshe kóńil bólinýde. Almatyda ashylǵan ortalyq – bul oqytýshylar men stýdentterge zamanaýı tehnologıalardy ıgerýge múmkindik beretin kásibı alań. Bizdiń maqsatymyz – mamandardyń kásibı deńgeıin kóterý jáne olardy halyqaralyq standarttarǵa saı daıyndaý. Qazaqstanda Jumysshylar jyly jarıalanǵany biz úshin mańyzdy. Bul – jumysshy mamandyqtarynyń bedelin kóterýdiń tamasha múmkindigi. Biz sizdermen birge osy salany damytýǵa daıynbyz. Konkýrsqa qatysýshylarǵa sáttilik, al stýdentterge aldaǵy halyqaralyq jarystarda jeńis tileımiz!