Ál-Farabı atyndaǵy Qazaq ulttyq ýnıversıtetinde QR Prezıdentiniń BAQ salasyndaǵy syılyǵynyń laýreaty, Memlekettik «Daryn» jastar syılyǵy men Qazaqstan Jastar Odaǵy syılyǵynyń ıegeri, QR Mádenıet qaıratkeri, fılosofıa ǵylymynyń kandıdaty, «Shalqar» radıosynyń dırektory Bolatbek Tólepbergenniń 50 jyldyq mereıtoıyna arnalǵan «Turaqty damý maqsattary aıasyndaǵy jýrnalısıka jáne baspa isi: dástúr men jańashyldyq» atty halyqaralyq ǵylymı-tájirıbelik konferensıa ótti.
Jıynnyń ashylý saltanatynda QR Prezıdentiniń keńesshisi Málik Otarbaev mereıtoı ıegerin Prezıdenttiń Alǵys hatymen, QazUÝ-niń prorektory Lázzat Qalymbekqyzy qazaq jýrnalısıkasyna sińirgen eńbegi úshin ýnıversıtettiń “Eren eńbegi” tósbelgisimen marapattady.
Ǵylymı jıynǵa aqyn-jazýshylar, BAQ basshylary men ókilderi, ǵalymdar, zıaly qaýym ókilderi qatysyp, dástúrli jýrnalısıka men saladaǵy jańashyldyq týrasynda baıandama jasady.
Konferensıada Bolatbek Tólepbergenniń “Alań jurt”, “Ulttyq ıdeıa - ulttyq medıa tuǵyry” atty kitaptary men jınaqtyń tusaýy kesildi. Jınaqqa osy ýaqytqa deıingi shyǵarmashylyǵy jáne saıasatkerler men jazýshylardyń Bolatbek Tólepbergen týraly jazǵandary toptastyrylǵan. Konferensıada qazirgi baspa isi máseleleri de jan-jaqty qozǵaldy.
“Azattyq ańsaǵan” derekti hıkaıatymda repressıa ýaqytyndaǵy bir áýlettiń taǵdyry sýretteledi. Qazaqstandaǵy ulttyq ıdeıanyń rýhanı adamgershilik negizderi degen turǵyda jazylǵan dúnıe. Ulttyq ıdeıa 90-jyldardan bastap mańyzdy taqyryptardyń biri boldy. Áli kúnge deıin Qazaqstanda ulttyq ıdeıa bar ma, qandaı máselelerden tamyr tartý kerek degen nárse ózektiligin joıǵan joq”,- deıdi Bolatbek Tólepbergen.
Taqyrypqa oraı
Pernebaı Dúısenbın, halyqaralyq “Alash” ádebı syılyǵynyń ıegeri, jazýshy:
San qyrly tulǵa
Bolatbek mektepte óte jaqsy oqydy. Basqa oqýshylardan minezimen de, tulǵasymen de erekshelenip turatyn. Sol kezdiń ózinde oblystyq, respýblıkalyq gazetterde maqalalary jarıalandy. Alǵashqy áńgimesi respýblıkalyq “Aq jelken” jýrnalynda basyldy. Qazaq ýnıversıtetine oqýǵa túskennen keıin, Qazaqstan Jazýshylar Odaǵy men «Atamura» korporasıasynyń jazýshy Oralhan Bókeı atyndaǵy stıpendıasynyń tuńǵysh ıegeri atandy. Jazǵanda tili kórkem, jan-jaqty qasıetimen kóptiń kózine tústi. Ol - ádebıetshi, jazýshy, jýrnalıs, fılosof, alashtanýshy. Osyndaı tulǵa meniń shákirtim bolǵanyn maqtan tutatynmyn.