Bul ortalyqty Sıngapýrda taǵylymdamadan ótip kelgen tárbıeshiler júzege asyrdy.
Sıngapýrlyq tájirıbeniń ereksheligi – mektep jasyna deıingi balalardyń álemdi zertteýine, shyǵarmashylyq daǵdysyn damytýyna kómektesetin jasandy qala qurý, dep habarlaıdy Almaty-akshamy.kz
Sonyń negizinde №1 balabaqsha balaqaılary tárbıeshilermen birigip jeke polısıa bólimshesi, dúkeni jáne dárigerlik kabıneti bar «Arman qala» dekorasıasyn qurastyrdy. Bul qalashyqta balalar emin-erkin oınaý úshin barlyq jaǵdaı jasalǵan.
145 bala tárbıe alyp jatqan bul damý ortalyǵynda 9 bólme bar. Ár bólme balalardyń shyǵarmashylyq daǵdysyn damytýǵa baǵyttalǵan: ınklúzıa, montessorı, kitaphana, zerthana, kórkem óner bólmesi, tuzdy shahta, sonymen qatar, logoped pen psıholog jumys isteıtin kabınetter de bar.
Balabaqsha meńgerýshisi Qymbat Qarabalaevanyń aıtýynsha, balalar óz qolymen buıymdar daıyndaý arqyly tanymdyq, shyǵarmashylyq qabiletin damytady. Osylaısha búldirshinder óz áleminiń kishkentaı qurastyrýshysy bola bildi.
Buǵan qosa, balabaqsha óndiristik mekemelermen ekskýrsıalar ótkizýge kelisim-shartqa otyrǵan. Olardyń qatarynda taýarly-sút fermasy, «Qamshy Brand» naýbaıhanasy, teri buıymdaryn jasaıtyn seh bar.
Osylaısha balabaqsha tárbıeshileriniń ǵylymı-zertteý jumystary balalardyń oı-órisin keńeıtýge, synı turǵydan oılaý, tyńdaý, este saqtaý qabiletterin damytýǵa yqpal etti. Balalardyń tanymdyq qyzyǵýshylyǵy men shyǵarmashylyq qabiletin damytýǵa septigin tıgizdi.
Sonymen birge, ortalyqta balalardyń sóıleý qabiletin damytyp, tilin jattyqtyrý maqsatynda teatr ashyldy. Munda barlyq bala shaǵyn qoıylymdarǵa qatysyp, ártistik ónerin de shyńdap keledi. Bul balalardyń mektepke deıin zeıinin qalyptastyryp, shyǵarmashylyq áleýetin jetildirýge múmkindik beredi.
Atap ótsek, 2023 jyldyń shilde aıynda Almaty qalasynyń mektepke deıingi bilim berý mekemeleriniń qyzmetkerleri «Mektepke deıingi tárbıe men oqytý salasynda qaıta daıarlaý jáne biliktilikti arttyrý» kýrsy boıynsha Sıngapýrda taǵylymdamadan ótken bolatyn.
Jaqynda munda «Balabaqshadaǵy zertteýshilik is-áreket arqyly balalardyń tanymdyq jáne shyǵarmashylyq qabiletin damytý» taqyrybynda qalalyq semınar ótti. Qalalyq mektepke deıingi bilim berý uıymdarynyń jetekshilerine oqytýdyń, oqýshylardyń ártúrli qajettilikterin qoldaýdyń jáne yntalandyrýshy oqý ortasyn qurýdyń ozyq tájirıbeleri men biregeı ádisteri usynyldy.